Технологийн томоохон компани болох Microsoft-ийн цахим шуудан, харилцаа холбоо болон хиймэл оюун ухааны программын үйлчилгээнүүд өчигдрөөс эхлэн дэлхийн олон оронд доголджээ.
Ингэснээр хэрэглэгчид нэвтрэх болон мэдээлэл солилцоход хүндрэлтэй тулгарч байгаа юм. Тус компанийн Outlook, Microsoft Teams, хиймэл оюун ухааны Copilot болон Microsoft 365-ийн зарим үйлчилгээ тасалдсан байна.
Microsoft компанийн мэдээлснээр дэд бүтцийн тодорхой хэсэгт ачаалал хэт нэмэгдсэн нь холболтын алдаа үүсэхэд нөлөөлжээ. Энэ нь хэрэглэгчдийн тоо нэмэгдсэнээс бус, зарим сервер гэнэт ажиллахаа больж, үлдсэн серверүүдэд ачаалал төвлөрсөнтэй холбоотой аж.
Доголдлын анхны тохиолдол АНУ-д бүртгэгдсэн ба бусад бүс нутгийн хэрэглэгчдэд ч нөлөөлж болзошгүйг компани анхааруулсан байжээ. Microsoft компани уг асуудлыг шийдвэрлэхийн тулд доголдол гарсан серверүүдийг дахин асааж, шалтгааныг тогтоохоор ажиллаж байгаагаа мэдэгдэв.
Доголдлын шалтгааныг үргэлжлүүлэн шалгаж байна
Microsoft нэмэлт арга хэмжээ авч, серверийн хэвийн ажиллагааг шалгах өөр хувилбарыг туршсанаар зарим серверийг дахин ажиллуулж чаджээ.
Түүнчлэн асуудал үүсгэж болзошгүй тохиргооны өөрчлөлтүүдийг шалгаж, цаашид доголдсон серверүүдийг автоматаар илрүүлж, сэргээх систем нэвтрүүлэхээр ажиллаж байна.
Outlook-ийн доголдлын талаарх хэрэглэгчдийн гомдол 130 мянга орчимд хүрчээ. Мөн Microsoft-ийн үйлчилгээнүүдээс гадна тус компанийн холболтыг ашигладаг зарим хиймэл оюун ухааны үйлчилгээ ч доголдолд оров.
Одоогоор серверүүд яагаад автоматаар ажиллагаагүй болсон үндсэн шалтгааныг компани бүрэн тогтоогоогүй бөгөөд үйлчилгээг хэвийн горимд шилжүүлэх ажил үргэлжилж байна.
Эх сурвалж: AP News, BBC
887
