Их Британийн ханхүү Харри эхнэр Меган Маркл болон хоёр хүүхдийн хамт эх орондоо буцаж ирсэн шалтгаанаа тайлбарлахдаа хүүхдүүддээ Британийн боловсрол эзэмшүүлэх, өөрийн өссөн орчин, соёлтой танилцуулахыг хүссэнээ ярьжээ.
Сассексийн гүн Харри GQ сэтгүүлд өгсөн ярилцлагадаа долоон настай хунтайж Арчи, таван настай гүнж Лилибет нарыг Британийн сургуульд сургах боломж гэр бүлийнх нь хувьд чухал байсныг онцолсон байна. Тэрбээр хүүхдүүд нь шинэ сургуульдаа дуртай байгааг хэлээд, АНУ болон Их Британийн боловсролын тогтолцоог харьцуулан өөр өөр соёлын орчинд суралцах нь хүүхдүүдэд үнэ цэнтэй туршлага болно гэжээ.
Зургаан жилийн дараа Их Британид буцаж ирсэн нь
Харри гэр бүлээрээ Их Британид буцах шийдвэрийг удаан хугацаанд нарийн төлөвлөөгүй бөгөөд нөхцөл боломж бүрдэхэд нүүхээр шийдсэн гэж ярьжээ. Тэрбээр хүүхдүүддээ өөрийн өссөн газар орон, соёлын орчныг таниулж, өөрийнх нь амьдралын сайн туршлагуудаас хуваалцуулахыг хүссэн байна.
“Гэр бүлийнхээ хувьд шинэ боломжуудыг эрэлхийлсэн хэрэг. Хүүхдүүдээ Британийн сургуульд сургах боломж надад маш их ач холбогдолтой байсныг би өөрөө ч өмнө нь төдийлөн ойлгоогүй байсан” хэмээн Харри ярьсан байна.
Түүний хэлснээр, Арчи, Лилибет нар Их Британид ирээд сургуульдаа хоёр долоо хоног суралцах хугацаандаа шинэ орчиндоо дуртай болжээ. Мөн долоо, таван настай хүүхдүүд хоёр өөр орны боловсрол, соёлын орчинтой танилцах нь өнөө үед чухал гэж үзэж байгаагаа илэрхийлсэн байна.
Харри мөн Их Британид буцаж ирснээр найз нөхөд, гэр бүлийнхэнтэйгээ ойр байж, хүүхдүүдээ үеийнхэнтэйгээ чөлөөтэй уулзаж, тоглох боломж бүрдсэнд баяртай байгаа талаараа ярьжээ.
Эх сурвалж: CBS news
811
