Дэлхийн охидын хамтлаг KATSEYE-ийн ахлагч Sophia Laforteza хамтлагийнхаа удахгүй болох сурталчилгааны үйл ажиллагаанд оролцохгүй бөгөөд эрүүл мэнд, сайн сайхан байдалдаа анхааран түр хугацаанд завсарлага авахаар болжээ.
Тус мэдээллийг хамтлагийн харьяалагддаг HYBE x Geffen наймдугаар сарын 7-нд Weverse-ээр дамжуулан албан ёсоор мэдэгдсэн бөгөөд KATSEYE-ийн албан ёсны Instagram хуудсанд мөн ижил мэдэгдлийг Story хэлбэрээр нийтэлсэн байна.
Мэдэгдэлд Sophia-г “түр хугацаанд удахгүй болох сурталчилгааны үйл ажиллагаанд оролцох боломжгүй” болохыг хэлээд, EYEKONS түүнийг тайзан дээр харахыг хэчнээн их хүлээж байсныг ойлгож байгаа ч түүний сэтгэцийн эрүүл мэнд, сайн сайхан байдлыг нэн тэргүүнд тавих нь хамгийн чухал гэдгийг онцолжээ.
SOPHIA-Д ЭМЧ НАРЫН ЗӨВЛӨСНИЙ ДАГУУ УРТ ХУГАЦААНД
АМРАХ ШААРДЛАГАТАЙ БОЛЖЭЭ
KATSEYE-ийн Instagram Story-д нийтэлсэн мэдэгдэлд Sophia одоогоор шаардлагатай бүх дэмжлэгийг авч байгаа бөгөөд эмнэлгийн мэргэжилтнүүдтэй нарийн зөвлөлдсөний дараа бүрэн эдгэрэхийн тулд удаан хугацаанд амарч, цаашдын асаргаа, халамж авахыг зөвлөсөн гэжээ.
Мөн Sophia өөрөө хамтлагийн гишүүдтэйгээ хамт тайзан дээр гарахыг маш их хүсэж байгаа ч уран бүтээлчдийнхээ эрүүл мэнд, аюулгүй байдал болон урт хугацааны сайн сайхан байдал нь үргэлж хамгийн өндөр ач холбогдолтой байх болно гэдгийг KATSEYE-ийн зүгээс онцолсон байна.
Тэд Sophia-гийн нөхцөл байдлыг үргэлжлүүлэн анхааралтай ажиглаж, эргэн сэргэх үйл явцад нь дэмжлэг үзүүлэхээ илэрхийлжээ.
SOPHIA ХЭЗЭЭ ЭРГЭН ИРЭХ ВЭ?
Одоогоор Sophia-гийн KATSEYE-д яг хэзээ эргэн нэгдэх нь тодорхойгүй байна.
Харин хамтлагийн зүгээс түүний нөхцөл байдлыг есдүгээр сард дахин үнэлж, цаашдын талаар EYEKONS-д дахин мэдээлэхээр төлөвлөж байгаагаа мэдэгдсэн байна.
Тиймээс энэ нь богино хугацааны хэдхэн өдрийн завсарлага гэхээсээ илүү тодорхойгүй хугацаанд үргэлжлэх эрүүл мэндийн шалтгаантай завсарлага болж байгаа юм.
“ЭХЛЭЭД MANON, ОДОО SOPHIA...”
Sophia-гийн завсарлага KATSEYE-ийн фэнүүдийн санааг улам ихээр зовоож байгаа нэг шалтгаан нь энэ оны эхээр өөр нэг гишүүн Manon Bannerman мөн хамтлагийн үйл ажиллагаанаас завсарласан явдал юм.
Manon хоёрдугаар сард эрүүл мэнд, сайн сайхан байдалдаа анхаарахын тулд түр хугацаанд завсарлаж байгаагаа зарласан. Гэвч түүнээс хойш хэдэн сар өнгөрсөн ч KATSEYE бүрэн зургаан гишүүний бүрэлдэхүүнээрээ эргэн нэгдэж амжаагүй байгаа юм.
Өмнө нь KATSEYE-ийн гишүүд Manon-д өөрт нь шаардлагатай цаг хугацаа, орон зайг өгөх хэрэгтэй гэдгийг хэлж байсан. Харин одоо Sophia мөн завсарлага авсан нь EYEKONS-ийн дунд олон асуулт төрүүлж эхэлжээ.
Сошиал орчинд “Эхлээд Manon, одоо Sophia... юу болоод байна вэ?”, “Тэдний эрүүл мэнд хамгийн чухал”, “Sophia-г яаралгүй амраасай”, “Хоёулаа эрүүл, аз жаргалтайгаар эргэн ирээсэй” гэх мэт санаа зовнил, дэмжлэг илэрхийлсэн сэтгэгдлүүд гарч байна.
Зарим фэнүүд хоёр гишүүн дараалан удаан хугацаагаар завсарлаж байгаа нь KATSEYE-ийн үйл ажиллагааны хуваарь, ажлын ачаалалтай холбоотой эсэх талаар ч асууж байгаа юм.
Гэхдээ HYBE x Geffen болон KATSEYE-ийн зүгээс Manon, Sophia хоёрын завсарлагыг ижил шалтгаантай гэж тайлбарлаагүй. Тиймээс одоогоор үүнийг ямар нэгэн тодорхой шалтгаантай холбон дүгнэх боломжгүй.
KATSEYE-ийн хувьд одоо хамгийн чухал зүйл нь Sophia болон Manon хоёрт шаардлагатай цаг хугацаа, орон зайг олгох явдал болоод байна.
Харин EYEKONS-ийн хувьд “Manon хэзээ эргэн ирэх вэ?”, “Sophia есдүгээр сард эргэн ирж чадах болов уу?”, “KATSEYE цаашид ямар бүрэлдэхүүнээр үйл ажиллагаагаа үргэлжлүүлэх вэ?” гэсэн асуултууд хариултаа хүлээсээр байна.
KATSEYE-ийн гурав дахь EP “WILD” наймдугаар сарын 14-нд нээлтээ хийхээр төлөвлөгдсөн бөгөөд Sophia-гийн завсарлага тус уран бүтээлийн сурталчилгааны үеэр тохиож байгаа юм.
