Сэтгэл судлаач Даниел Канеман нэгэнтэ, "Амжилт = авьяас + аз. Их амжилт = арай илүү авьяас + маш их аз." гэж бичсэн.
Үүнээс улбаалан амжилтыг зөвхөн чадвараар биш, аз, зөв цаг үе, маркетинг, нэр хүндийн нийлбэр гэж тайлбарлах нь элбэг. Үнэхээр ч хамгийн алдартай хүн үргэлж хамгийн чадвартай байдаггүй нь бас үнэн.
2026 оны ДАШТ өөр нэг үнэнийг харуулж байна. Хамгийн том тайзан дээр хамгийн том одууд нэр хүндээрээ бус, тоглолтоороо үнэ цэнээ баталж байна. Месси, Мбаппе, Роналду, Холанд, Винисиус Жр зэрэг тоглогчид зөвхөн хувь хүний ур чадвараараа биш, тэднийг амжилтад хүргэх орчин бүрдсэн учраас гялалзаж чадаж байна. Эндээс байгууллага, баг удирддаг хэн бүхэнд хэрэгтэй хэдэн сургамж гарч ирнэ:
Шилдэг хүмүүсээ өөрчлөх гэж биш, системээ тэдний давуу талд нийцүүл. Аргентин тоглолтоо Мессигийн онцлогт тулгуурлан зохион байгуулж, Португал Роналдуг довтолгооны төв цэг хэвээр үлдээсэн. Өөрөөр хэлбэл, хамгийн үнэ цэнтэй тоглогчдоо системдээ хүчээр багтаах биш, системээ тэдний давуу талд тохируулжээ.
Шилдэг хүмүүсээс бүхнийг хийхийг бүү шаард. Супер одууд хамгаалалт, хар ажилд бус, хамгийн сайн хийдэг зүйлдээ төвлөрсөн. Багийн бусад тоглогчид шаардлагатай үүргийг хуваалцаж, тэдний сул талыг нөхсөн. Байгууллагад ч ялгаагүй, өндөр үнэ цэнэ бүтээдэг хүмүүсийг хамгийн их үнэ цэн бий болгодог ажилд нь төвлөрүүлэх нь илүү үр дүнтэй.
Хамгийн чухал хүмүүсээ ил тод дэмж. Дарамт хамгийн их ирдэг хүмүүс бол ихэвчлэн хамгийн өндөр хүлээлттэй хүмүүс байдаг. Францын дасгалжуулагч Дешам нь Мбаппег олон нийтийн шүүмжлэлээс хамгаалж, итгэлээ хэвээр хадгалсан. Ийм итгэл нь зөвхөн тухайн тоглогчид бус, бүх багт эерэг нөлөө үзүүлдэг.
Эцсийн дүндээ супер оддын амжилт зөвхөн тэдний төрөлхийн авьяас биш. Тэдний эргэн тойронд бий болсон тогтолцоо, багийн ажиллагаа, манлайлал ч мөн адил чухал үүрэгтэй.
Шилдэг хүмүүсийг амжилтад хүргэдэг нь зөвхөн чадвар биш, харин тэр чадварыг бүрэн ашиглах боломж олгодог менежмент юм. Тиймээс жинхэнэ манлайлал гэдэг нь бүх хүнийг ижил болгох бус, хамгийн үнэ цэнтэй хүмүүсээ хамгийн үнэ цэнтэй ажлаа хийх нөхцөлөөр хангах ур чадвар юм.
Нийтлэлийг Д.Ган-Очир
Эх сурвалж: The Economist, July 4th 2026
