Номын баяр өнөөдөр (2026.05.15) эхэллээ. Баяр маргааш бас нөгөөдөр үргэлжлээд дуусна. Сүхбаатарын талбай урьд өдрүүдийнхээс илүү “амь” оржээ. Жил бүрийн энэ өдрүүдэд хот арай өөр хэмнэлтэй болчихдог билээ. Д.Сүхбаатар жанжны хөшөөний хойд хэсэгт хонхны баяр болж дуу хуур цалгих бол, дунд хэсэгт номын асруудад хүмүүс дүүрэн энийг ч, тэрийг ч үзье хэмээн дүнгэнэлдэнэ. Харин талбайн урд захаар халуун хуушуур, хүйтэн ундаа худалдаалах нь наадмыг санагдуулав.
Номын сонголт арвинтай, шинэ номууд олонтой баяр болж байна. Энэ жилийн баяраас анзаарвал шинэ үеийн зохиолчид номдоо нийтлэгээрээ өөрийнхөө танилцуулгыг бичихээ байжээ. Урьд нь номын арын хавтаснаас эсвэл өмнөх үгээс зохиолчийн нас, мэргэжил, хаана сурсан, ямар шагнал авсныг уншдаг, зургийг ч харчихдаг байсан бол одоо тийм биш болжээ.
Тө.Бямбасүрэн “Улам дөжрөм, тэгээд нам гүм”, Ч.Бат-Уянга “Ахуй”, М.Баасандэлгэр “Төгсгөл үгүй” гэсэн гурван ном худалдан авлаа. Эдгээр номд зохиолчийн тухай мэдээлэл алга. Номын хавтас, эхний нүүр, төгсгөлийн хэсгийг эргүүлж үзсэн ч намтар, мэргэжил, зураг нь байсангүй.
Магадгүй энэ нь зохиолчийг биш, зохиолыг нь уншаарай гэсэн шинэ үеийн хэв маяг. Нөгөө талаар цахим хэрэглээ хөгжсөн өнөө үед номын эсвэл зохиолчийн нэрийг хайхад л сошиал хаяг, туурвисан бүтээл нь даруй гараад ирэх тул ном дотроо заавал өөрийгөө танилцуулах шаардлагагүй болсон ч байж мэднэ.
Мөн улстөрч байсан хүний, одоогийн УИХ-ын гишүүний бичсэн номуудыг худалдаалж байна. УИХ-ын гишүүн Ч.Лодойсамбуу “Хугархай эрүүний шөл” номоо худалдаалж, өөрөө гарын үсэг зурж сууна. Ерөнхий сайд асан С.Баярын “Жаран хоног”, “Далан нөхөөс”, “Наян нажид” гэсэн гурван номыг багцаар нь 99,000 төгрөгөөр худалдаалж байна.
Нүд хужирлаж, халаас нимгэлэх орчуулгын номууд ч бас байна. “Тагтаа” хэвлэлийн газар “Үхмээр байна, гэхдээ л бас догбуги идмээр байна” номын хоёр дахь дэвтрийг эх хэлнээ хөрвүүлжээ. Өмнөд Солонгосын зохиолч Пэк Сэхигийн энэ ном ч гүйлгээтэй байгаа харагдана.
Зав гарвал номын баяраар нэг ороод гараарай.
