Дээрэлхэлт олон хэлбэртэй ч бүх төрлийн дээрэлхэлт хор хөнөөлтэй. Ялангуяа, дээрэлхэгдэж гадуурхагдсан хүүхдүүд насан туршдаа сэтгэл санаагаараа хохирдог. Тиймээс энэ явдлыг таслан зогсоох нь чухал. Хэрэв та дээрэлхэлтэд өртсөн бол хийж болох хэдэн зүйл бий.
1. Холдож явах
Хэрэв нөхцөл байдал аюултай юм шиг байвал дээрэлхэгч этгээдээс холдсон нь дээр. Ер нь аюултай нөхцөл байдал биш байсан ч хэн нэгэн чамд муу үг хэлэхийг сонсох шаардлагагүй. Тэр хүнээс тайвнаар холд. Энэ нь та үүнийг тэвчихгүй гэсэн мессежийг илгээх болно.
2. Бусдад хэл, тэгвэл дээрэлхэгч зогсоно
Дээрэлхэлтийг зогсоохын тулд нэн даруй мэдэгдэх нь чухал. Дээрэлхүүлж байгаагаа хэн нэгэнд хэлснээр та өөрийнхөө төлөө зогсож, хүчирхийллийг тэвчихгүй гэдгээ харуулах болно.
- Танд тусалж чадах багш, эцэг эх, нийгмийн ажилтан эсвэл өөр хэн нэгэнд дээрэлхэгч тантай юу ярьж, юу хийснийг шууд хэлээрэй. Эсвэл цагдаад хандаарай.
- "Батаа намайг дээрэлхээд байна. Тэр намайг тарган гэж доог тохуу хийсэн. Би түүнийг зогсоож чадахгүй байна. Надад тусламж хэрэгтэй байна" гэж хэл.
- Мөн юу болж байгаа талаар тэмдэглэл бичиж болно. Тэмдэглэлээ багш, нийгмийн ажилтан эсвэл захиралдаа өг.
- Таны тусламж хүссэн хүн дээрэлхэлтийг зогсоох талаар юу ч хийгээгүй бол өөр хүнд хэлээрэй. Доромжлолыг тэвчих хэрэгтэй юм байна гэж хэзээ ч бүү бодоорой.
3. Хэрэв өөрийгөө аюулгүй гэж бодвол дээрэлхэгчээс зогсохыг шаард
Хэрэв зодуулах аюул байхгүй бол өөрт нь зохисгүй хандахыг тэвчихгүй гэдгээ тайвнаар мэдэгдэх нь зөв.
- Шийдвэртэй дүр үзүүлэхийн тулд сууж байсан бол босоод нүүр тулж зогсох хэрэгтэй. Гараа эвхэх, өвдгөө нугалж, доош харж, өөрийгөө жижгэрүүлж болохгүй. Цэх зогсож, гараа хоёр талаараа унжуулж, хөлдөө мөрний хэмжээтэй зай аваарай.
- Хүсэлтээ товч бөгөөд шууд илэрхийл. "Боль" гэж хэлээрэй. Дээрэлхэж буй хүүхдийн нүд рүү эгц харж, тайван, тод дуугаар ярь.
- Дээрэлхэгчийг магтаж юм уу доромжилж болохгүй. Хэрэв танхай этгээд таныг гутаасны дараа түүнд сайхан үг хэлбэл өөрийгөө доош хийж, тэдний өөртөө итгэх итгэлийг нэмэх болно.
4. Тайван бай
Танхайрсан хүний зорилго бол таны сэтгэл хөдлөлийн хариуг авах юм. Иймд тайван байж, тэдэнд ямар мэдрэмжтэй байгаагаа харуулахгүй байх хэрэгтэй. Уурласан, гунигласан, айж байгаагаа мэдэгдэхгүй байхыг хичээгээрэй. Тэд таны сэтгэл хөдлөлийг мэдэрвэл даварч магадгүй юм.
- Хэд хэдэн удаа гүнзгий амьсгаа аваад, шалгалтад сайн дүн авах, нохойтойгоо тоглох эсвэл амралтын өдрөөр гэр бүлтэйгээ хамт хийхээр төлөвлөж буй хөгжилтэй зүйлс гэх мэт таныг аз жаргалтай болгодог зүйлийг бодоорой. Ингэснээр сэтгэл хөдлөлдөө хариу үйлдэл үзүүлэхээс зайлсхийхэд тусална. Гэхдээ нүдээ анилгүй түүнтэй харьцах ёстой.
- Дээрэлхсэн хүнд тайван байдлаар хариулаарай. Жишээлбэл та "Чи өөрийгөө хөгжилтэй гэж бодож байна уу, тийм биш. Больж үз" гэж болно. Эсвэл "Одоо боль, эсвэл би чамайг багшид хэлэх үү?”
- Харин аюул учирч магадгүй гэж бодвол дээрэлхэгчтэй бүү нүүр тул.
- Дараа нь дээрэлхэгчийн талаар эцэг эх, нийгмийн ажилтан эсвэл багшдаа заавал хэлээрэй.
Эх сурвалж: wikihow.com
