Жил бүрийн 3-р сарын эхний долоо хоногт Монгол Улсын төрийн өмчийн бүх музей үүд хаалгаа үнэ төлбөргүй нээдэг уламжлалтай. Энэ жил төр, нийгмийн нэрт зүтгэлтэн А.Амарын 140, Ж.Батмөнхийн 100, их зохиолч Д.Нацагдоржийн 120 жилийн ой тохиож байгаагаараа онцлог бөгөөд музей бүр тусгай үзэсгэлэн, боловсролын хөтөлбөрүүд бэлджээ.
Хэрэв та эдгээр өдрүүдэд хаашаа очиж, ямар музей үзэхээ мэдэхгүй байгаа бол дараах 10 музейг санал болгож байна.
1. "Чингис хаан" үндэсний музей
Хэрэв та олон улсын стандартад нийцсэн, орчин үеийн музей үзэхийг хүсвэл хамгийн түрүүнд энд ирээрэй. Нийт 9 давхар энэ байгууламж бол Монголын түүхийн амьд нэвтэрхий толь юм. Эндээс та Хүннү гүрнээс эхлээд XX зууны эхэн үе хүртэлх хаадын тамга, алт мөнгөн эдлэл, түүхэн ховор олдворуудыг нэг дороос үзнэ.
Цагийн хуваарь: 09:00 – 17:00 (Мягмар гарагт амарна).
2. Монголын Үндэсний музей
Бидний өвөг дээдэс ямар хувцас өмсөж, ямар багаж зэвсэг хэрэглэж байсныг "Монголын Үндэсний музей" бүрэн харуулдаг. Ялангуяа угсаатны зүйн танхим дахь олон ястны гоёл чимэглэл, эхнэрийн дээлүүд гадаад дотоодын жуулчдын нүдийг хужирладаг гол үзвэр юм. Энэ музей долоо хоногийн турш тасралтгүй ажиллах тул та завтай үедээ зориорой.
Цагийн хуваарь: 09:10 – 16:30 (Долоо хоногийн турш нээлттэй).
3. Богд хааны ордон музей
Монголын сүүлчийн хаан VIII Богд Жавзандамба болон түүний хатан Дондогдуламын амьдарч байсан өвлийн ордон музей нь түүхэн уур амьсгалыг хамгийн сайн хадгалсан газар. Баавгайн арьсан гэр, хааны сүйх тэрэг, ирвэсийн арьсан дотортой дээл зэрэг тансаг хэрэглэлүүд таныг зуун жилийн өмнөх цаг хугацаанд аваачих болно.
Цагийн хуваарь: 09:00 – 17:00 (Мягмар, Лхагва гарагт амарна).
4. Г.Занабазарын нэрэмжит Дүрслэх урлагийн музей
Г.Занабазарын нэрэмжит Дүрслэх урлагийн музейд дэлхийд гайхагддаг Өндөр гэгээн Занабазарын хосгүй бүтээлүүд хадгалагддаг. Тэр дундаа "Цагаан Дарь эх" баримал болон Б.Шаравын "Монголын нэг өдөр" зургийг эх хувиар нь харах боломж олдож байна. Урлагт хайртай залуусын заавал очих цэг бол энэ юм.
Цагийн хуваарь: 09:00 – 17:30 (Долоо хоногийн турш нээлттэй).
5. Байгалийн түүхийн музей
Монгол орны байгалийн баялаг, ургамал, амьтан, геологийн тогтцыг нэг дороос харах боломжтой. Ялангуяа хүүхэд залуучуудад хамгийн сонирхолтой байдаг. Эндээс ховордсон амьтдын чихмэл, эртний амьтдын яс, сансрын солирын хэлтэрхийнүүдийг харах боломжтой.
Цагийн хуваарь: 09:00 – 18:00 (Сүүлчийн үзэгч 16:00).
6.Чойжин ламын ордон музей
Улаанбаатар хотын хамгийн өндөр барилгуудын дунд орших энэхүү музей нь 100 гаруй жилийн түүхтэй. Энэ бол Монголын сүүлчийн хаан VIII Богд Жавзандамба хутагтын дүү, Төрийн чойжин Лувсанхайдавт зориулж баригдсан сүм юм.Цам харайх ёслолд ашигладаг, эрдэнийн чулуугаар чимэглэсэн маш нарийн хийцтэй баганууд болон Төв Азийн бурхны шашны хосгүй зургуудыг эндээс харна.
Цагийн хуваарь: 10:00 – 16:30 (Даваа, Мягмар гарагт амарна).
7. Монголын Театрын музей
Сүхбаатарын талбайн зүүн талд, Соёлын Төв Өргөөний III давхарт байрладаг энэ музей урлагт хайртай хүн бүрийн заавал зочлох цэг юм.Энэ жил их зохиолч Д.Нацагдоржийн 120 жилийн ой тохиож буйтай холбоотойгоор түүний амьдрал, уран бүтээлийг харуулсан тусгай танхимыг зориорой. Мөн Монголын анхны кинонууд, театрын тайзны ховор хувцас хэрэглэлийг үзэж сонирхох боломжтой.
Цагийн хуваарь: 09:00 – 17:00 (Мягмар гарагт амарна).
8. Монгол Цэргийн музей
Эртний нүүдэлчдийн байлдааны урлаг, хуяг дуулгаас эхлээд орчин үеийн зэвсэгт хүчний хөгжлийг энд харуулдаг. Музейн гадаа талбайд байрлах байлдааны техникүүд (танк, онгоц, пуужин) хамгийн сонирхолтой нь. Харин дотор танхимд эртний баатруудын иж бүрэн хуяг дуулга, зэр зэвсгийг дэлгэн тавьсан байдаг.
Цагийн хуваарь: 09:00 – 17:00 (Мягмар гарагт амарна).
9. Улаанбаатар хотын музей
Анх 1912 онд баригдсан түүхэн барилгад (буриад худалдаачны байшин байсан) байрладаг энэхүү музей хотын иргэн бүрийн мэдэх ёстой түүхийг хадгалдаг. 1912 оны "Нийслэл хүрээ"-ний макет болон Г.Дондог зураачийн зурсан "Нийслэл хүрээ" хэмээх том хэмжээний зураг. Эндээс та өнөөдрийн Улаанбаатар хот 100 жилийн өмнө ямар байсныг гэрэл зураг, газрын зургаар харьцуулж харах болно.
Цагийн хуваарь: 08:00 – 17:00 (Бямба, Ням гарагт амарна).
10. Монголын Уран зургийн галерей
Монголын сор болсон уран бүтээлчдийн 4000 гаруй сод бүтээл энд хадгалагдаж байна. Монголын дүрслэх урлагийн "алтан үе"-ийн бүтээлүүд болох Ц.Даваахүү, Л.Гаваа, Г.Одон нарын алдартай зургууд. Мөн "Нээлттэй өдрүүд"-ийн хүрээнд Монголын төр, нийгмийн зүтгэлтнүүдийн ойд зориулсан тусгай үзэсгэлэн гарч байгаагаараа онцлог юм.
Цагийн хуваарь: 09:00 – 18:00 (Долоо хоногийн турш нээлттэй).
Музей үзэхдээ анхаарах Алтан дүрэм
Музейн нээлттэй өдрүүдээр ачаалал их байдаг тул та дараах зөвлөгөөг дагаснаар цагаа хэмнэж, соёлтой үйлчлүүлж чадна.
- Маршрутаа ухаалгаар төлөвлөх
Хотын төвийн тойрог: Сүхбаатарын талбай орчимд байрлах Үндэсний музей -> Чингис хаан музей -> Уран зургийн галерей -> Театрын музей-г нэг өдөр багтаан үзэх боломжтой. Эдгээр нь хоорондоо 5-10 минут алхах зайд байрладаг.
Түүхэн орднуудын тойрог: Богд хааны ордон музей -> Чойжин ламын сүм музей-г дараалан үзвэл архитектурын ялгааг мэдрэхэд сонирхолтой.
- Соёлтой үзэгч байх
Үзмэрт бүү хүр: Таны гар дээрх тос, чийг эртний ховор үзмэрийг гэмтээх аюултай тул зөвхөн нүдээрээ сонирхоорой.
Чимээгүй орчин: Гар утсаа "Silent" горимд шилжүүлж, бусдад саад болохгүйгээр аяархан ярих нь музейн соёл юм.
Гэрэл зураг: Музей бүрийн зураг авах журам өөр байдаг. Хэрэв зөвшөөрсөн бол үзмэрийн өнгийг алдагдуулахгүйн тулд Flash буюу гэрэл цохиулахгүйгээр зураг аваарай.
- Бэлтгэлээ базаах
Цагаа шалгах: Ихэнх музейн касс хаахаас 60 минутын өмнө тасалбар олгохоо зогсоодог тул хамгийн сүүлчийн цагийг хүлээлгүй очоорой.
Дулаан хувцаслах: Богд хааны ордон зэрэг түүхэн барилгууд өвлийн улиралд сэрүүн байдаг тул дулаан хувцаслах нь чухал.
Зөвлөгөө:
Орон нутгийн музейнүүд ч мөн адил үнэ төлбөргүй үйлчилж байгаа тул хэрэв та хөдөө орон нутагт байгаа бол тухайн аймгийнхаа "Орон нутгийг судлах музей"-г заавал зориорой.
