Кино урлагийн ертөнцөд бодит амьдралаас давж, уран сэтгэмжийг хамгийн тод өнгөөр илэрхийлдэг салбар бол яах аргагүй анимэйшн билээ. Зөвхөн хүүхдийн төсөөлөл гэлтгүй, насанд хүрэгсдийг ч ид шидийн ертөнцөөр аялуулж чаддаг гайхамшигт урлаг юм. Сүүлийн жилүүдэд кино, анимэйшн компаниуд технологийн дэвшлийг ашиглан бидний хүлээж байснаас илүү өвөрмөц, содон сонирхолтой бүтээлүүд ихийг хийж байна. Ингээд эл нийтлэлээр энэ онд багтаж нээлтээ хийх найман анимэйшныг танилцуулъя.
THE TWITS
Нээлтийн огноо: Аравдугаар сарын 17
Нийт үргэлжлэх хугацаа: 1 цаг 38 минут
Хаанаас үзэх: Netflix
Тус анимэйшныг зохиолч Роалд Даллын 1980 онд гарч байсан ижил нэрт номоос сэдэвлэн бүтээжээ. Анимэйшн дэлхий дээрх хамгийн муухай ааштай, хэрцгий хосууд болох ноён болон хатагтай Твитсийн түүхийг өгүүлнэ. Тэд бохир заваан, зугаа цэнгэлийн “Твитландиа” гэх паркийн ажлуулдаг. Гэвч хосууд хорон арга мэхээрээ хотдоо ноёрхлоо тогтоож, эрх мэдлийг авна. Энэхүү шударга бус байдалтай эвлэрч чадахгүй байгаа хоёр өнчин хүүхэд болон ид шидийн сармагчин хамтран тэмцэж эхэлж буйгаар үйл явдал өрнөнө.
IN YOUR DREAMS
Нээлтийн огноо: Арваннэгдүгээр сарын 14
Нийт үргэлжлэх хугацаа: 1 цаг 30 минут
Хаанаас үзэх: Netflix
Эл анимэйшн эцэг эхийнхээ салах эрсдэлтэй тулгарсан арван настай Стиви болон түүний бяцхан дүү Эллиот нарын сонирхолтой үйл явдлыг харуулна. Тэд гэр бүлээ төгс байлгахын тулд элсний хүн гэх домогт баатрыг олохоор хичээнэ. Нэгэн орой эгч дүү хоёр унтаад сэрэхдээ зүүдний ертөнцөд ирчихсэн байна. Энэхүү ертөнцөд тэд ухаантай, хоржоонтой чихмэл анааш, зомби болсон өглөөний хоолны бүтээгдэхүүнүүд, мөн аймшигт шөнийн хатан зэрэг сонирхолтой бас аюултай саад бэрхшээлүүдтэй тулгарна.
Адал явдлынхаа туршид тэд хүссэн "төгс" гэр бүлээ олох бус харин жинхэнэ гэр бүлийн үнэ цэнэ, эгч дүүгийн бат бөх холбоо мөн хэрхэн хүчтэй, өөртөө итгэлтэй байхыг ойлгож ухаарах сэтгэл хөдөлгөм, хөнгөхөн анимэйшн юм.
ZOOTOPIA II
Нээлтийн огноо: Арваннэгдүгээр сарын 26
Нийт үргэлжлэх хугацаа: 1 цаг
Хаанаас үзэх: Urguu Cinema
Урьдын адил Зоотопиа хотын цагдаа Жуди Хоппс, Ник Уайлд нар дэг журмаа тогтоохоор шаргуу ажиллана. Гэтэл энэ үеэр Гари хэмээх нууцлаг могой гарч ирснээр хотод нь үймээн самуун дэгдээж, хотын дэг журмыг орвонгоор нь эргүүлнэ. Хэргийг илрүүлэхийн тулд Жуди, Ник хоёр хотын өмнө нь хэзээ ч үзэгдэж байгаагүй, хаягдмал, гэмт хэрэг ихтэй дүүрэг болох Марш Маркет-д нууц ажиллагаа явуулах шаардлагатай болно. Энэ нь мөлхөгч амьтад голдуу амьдардаг, нийгмийн тусгаарлагдсан хэсэг юм. Мөрдлөгийн явцад Жуди, Ник хоёр бусдад могойн хамсаатнууд болж буруугаар ойлгогддог. Гэвч энэ үед могой тэдэнд тусалснаар түүнийг тийм ч муу амьтан биш байсныг анзаарна.
DAVID
Нээлтийн огноо: Арванхоёрдугаар сарын 19
Нийт үргэлжлэх хугацаа: 1 цаг 55 минут
Хаанаас үзэх: Angel Studios
Израли Улсын түүхэнд Девид гэх хүчирхэг хаан байсан билээ. Эл анимэйшн түүний түүхийг өгүүлнэ. Үйл явдалд дэлхийн хаа нэгтээ хонио хариулж буй Девид гэх залуухан хүүг харуулна. Тэрээр хонио хариулахдаа үргэлж л дуулж, хөгжим тоглох дуртай. Энэ үеэр түүний амьдардаг улсад томоохон дайн гарсан байх агаад хүү өөрийн итгэлтэй байдал, чулуун зэвсэг ашиглан дайсны талаа тун сурамгай дийлчихнэ. Уг анимэйшнаар дамжуулан Девид хааны дайчин, яруу найрагч, удирдагч, хөгжимчин зэрэг бүхий л чадварыг харуулахыг зорьжээ.
MISSION SANTA: YOYO TO THE RESCUE
Нээлтийн огноо: Арваннэгдүгээр сарын 6
Нийт үргэлжлэх хугацаа: 1 цаг 22 минут
Хаанаас үзэх: Зөвхөн АНУ кино театруудаар нээлтээ хийнэ, удалгүй Netflix, Amazon Prime Video, Apple tv дээр тавигдана.
Зул сарын баярт чин сэтгэлээсээ дурласан элф Ёоёо шинэ ажилд орно. Гэвч төд удалгүй Ёоёо Сантагийн цехийг эзэлж, зул сарын баярыг нураах төлөвлөгөөтэй хорон санаат хакер байгааг олж мэднэ. Тэрээр ажлын нөхөдтэйгөө хамтран хакерийг илрүүлж, баярыг аврахаар чадлаараа тэмцэнэ. Тэр чадах болов уу?
FINNICK II
Нээлтийн огноо: Аравдугаар сарын 23
Нийт үргэлжлэх хугацаа: 1 цаг 25 минут
Хаанаас үзэх: Plex
Финник бол үл үзэгдэх чадвартай ногоон амьтан. Тэрээр санамсаргүйгээр эртний ид шидтэй саваа гээж, үл үзэгдэх чадвараа алдсанаар бусад төрөл нэгтнүүдээ аюулд оруулдаг. Ингэснээр Финник найз Кристинтэй хамтдаа найзуудыгаа аврахын тулд адал явдалтай аялалд гарна.
THE GROWCODILE
Нээлтийн огноо: Арваннэгдүгээр сарын 6
Нийт үргэлжлэх хугацаа: 1 цаг
Хаанаас үзэх: Apple tv
Жаахан охин болон бяцхан матрийн нөхөрлөлийн гэгээхэн түүхийг өгүүлнэ. Охин нэгэн өдөр гадуур зугаалж яваад жижигхэн мартын зулзагыг олдог. Ингээд гэртээ авчирч, өсгөж хүмүүжүүлэхээр шийднэ. Өдрөөс өдөрт тэд хамтдаа өсөж, олон саад бэрхшээлийг даван туулахын зэрэгцээ итгэл, хариуцлагын үнэ цэнийг ойлгон, өөрсдийн амьдралын зорилгоо ч тодорхойлно.
THE SPONGEBOB MOVIE: SEARCH FOR SQUAREPANTS
Нээлтийн огноо: Арванхоёрдугаар сарын 19
Нийт үргэлжлэх хугацаа: 1 цаг 28 минут
Хаанаас үзэх: Paramount+
Далайд амьдардаг Sponge Bob болон түүний найзын адал явдлыг уншигч та бүхэн санаж байгаа л биз дээ. АНУ-ын найруулагч Дерек Дримон тус бүтээлийн дахин шинэчилж, илүү чанартайгаар үзэгчдэд хүргэж байна. Зохиолын үйл явдалд Sponge Bob далайн гүн рүү аялал хийх ба далайн шуургач сүнсийг хайх хэцүүхэн эрэлд гарч буйг өгүүлнэ.
Эх сурвалж: IMDb
