Ганцаардал өдөрт 15 тамхи татсантай адил, сөрөг нөлөөтэй. Гэхдээ бид харилцаа холбоо тогтоох боломж хамгийн сайн хөгжсөн эрин үед амьдарч байна.
Ухаалаг утсаар та хэнтэй, хэзээ ч, хаана ч байсан холбоо тогтоож болно. Иймд бидний нэг өдөрт хүлээн авдаг мессеж ихээхэн өссөн тул зарим хүн бусдаас тусгаарлагдан, ганцаараа байхыг хүсдэг.
Тэгвэл үүний тэнцвэрийг хэрхэн олох вэ? Ганцаараа байх, ганцаардах нь ялгаатай юу? Ковид-19 цар тахлын улмаас олон сая хүн гэртээ ганцаараа үлдэж, бусдаас тусгаарлагдахад хүрсэн.
Мэргэжилтнүүд ганцаардлыг “Та хүссэнээсээ цөөн хүнтэй нийгмийн харилцаа тогтооход бий болдог, таагүй мэдрэмж” гэж тодорхойлжээ.
Та бусадтай холбоо харилцаатай атлаа тэр нь таны хүссэн шиг биш үед ганцаардах нь ч бий. Тэгэхээр харилцааны давтамжаас гадна чанар чухал.
Тэгэхээр алс хол газарт амьдардаг хүнээс гадна олны дунд байгаа нэгэн ч ганцаарддаг. Хүмүүсийн дунд байгаа ч та тэр бүлэгт хамааралгүй, харьяалагдахгүй мэт санагдвал та ганцаардаж буйн шинж юм.
Энэ нь удаан үргэлжилбэл эрүүл мэндэд сөрөг нөлөөтэй. Их Британийн Кэмбрижийн их сургуулийн хийсэн судалгаагаар ганцаардал зүрхний өвчин, саажилт, чихрийн шижинд өртөх, халдвар амархан авдаг болоход хүргэдэг байна.
Цаашлаад бухимдал, сэтгэцийн доройтол, түгшүүртэй болохын сацуу үхэлд ч хүргэж болно. Эмч нар энэ үйл явц хэрхэн өрнөдгийг нарийвчлан тогтоогоогүй байна.
Дэлхийн эрүүл мэндийн байгууллага ахмад настнуудын ¼ нь нийгмээс тусгаарлагддаг бол өсвөр насныхны 5-15 хувь нь ганцаарддаг гэжээ. Наснаас гадна дүрвэгсэд, үндэсний цөөнх, шилжин суурьшигчид, бэлгийн цөөнх, бусдыг асардаг ажил хийдэг хүмүүс илүү ганцаарддаг.
Ганцаардлыг хэрхэн давах вэ?
Сайн дурын ажил хийх. Хонконгийн 375 сайн дурын ажилтныг хамруулсан судалгаагаар тэд зорилгодоо хүрэхийн тулд чөлөөт цагаа ашигласан ч ганцаардлаас ч гарсан гэжээ.
Австрали, Нидерланд улсуудад залуус ахмадуудтай хамт цагийг өнгөрөөх боломжтой төвүүд байгуулж байна. Их Британид эмч нарын дунд нийгмийн жор гэсэн хэллэг бий болж, тэд ганцаардсан байж болзошгүй гэж үзсэн өвчтөнд энэ жорыг бичдэг. Тэднийг аль болох бусадтай хамт байхыг зөвлөдөг байна.
Сэтгэл зүйч Холан Лиан “Хамтач, хүлээцтэй нийгэм бүтээх нь чухал. Бид бусдад таатай хандаж, нэг нэгэндээ тусалдаг байвал ганцаардахгүй. Бид найз нөхөдтэйгээ, гэр бүлийнхэнтэйгээ ямар харилцаатай вэ гэдгээ бодож, анзаарч байх хэрэгтэй” гэжээ.
Хэрэв та үргэлж уйтгарлан, гэрээсээ гармааргүй байвал, эргэн тойрны хүмүүс, газар оронтой холбоогүй мэт санагдвал Та ганцаардаж буйн шинж юм.
Эх сурвалж: BBC
