Ерөнхий боловсролын сургуулийн 10-12 дугаар ангийн сурагчдыг “Бүс, орон нутгийн хөгжилд миний оролцоо” эсээ бичлэгийн уралдаанд оролцохыг урьж байна.
“Монгол Улсын бүсчилсэн хөгжлийн үзэл баримтлал”-д Монгол Улсыг Хангайн, Баруун, Хойд, Төвийн, Зүүн, Говийн, Улаанбаатарын нийт 7 бүс, 91 орон нутгийн хөгжлийн төвтэй байхаар тусгасан бөгөөд бүс нутгийн хөгжилд шинэлэг, бүтээлчээр хандаж, асуудлын шийдлийг олоход ерөнхий боловсролын ахлах ангийн суралцагчдын санал, бодол чухал юм.
Бүсчилсэн хөгжлийн бодлогыг ерөнхий боловсролын суралцагчдын дунд түгээн дэлгэрүүлэх, ойлголтыг дээшлүүлэх замаар бүс, орон нутгийнхаа хөгжлийн чиг хандлагад шинэ санаа, шийдэл дэвшүүлэн улмаар орон нутгийн хөгжилд бодит хувь нэмэр оруулах боломжийг олгох, эх оронч иргэнийг төлөвшүүлэх, дэмжин урамшуулахад тус уралдааны зорилго оршино.
ЭСЭЭ БИЧЛЭГИЙН СЭДЭВ:
Суралцагч өөрийн амьдарч буй бүс, орон нутгийн хөгжлийн талаар өөрийн санал бодлыг олон нийтэд хүргэх зорилгоор сэдвийг чөлөөт байдлаар болон дараах жишиг сэдвүүдээс сонгон, эсээг бичнэ. Үүнд:
- Монгол хүн дэлхийн бусад үндэстнээс онцгой
- Мал аж ахуйн салбарыг хөгжүүлэх ирээдүйн Монгол иргэн
- Манай бүс нутгийн хөгжилд тулгарч буй бэрхшээл, түүний шийдэл
- Манай бүс нутагт хөгжих боломжтой салбар (аялал жуулчлал, бизнес, үйлдвэр, үйлчилгээ гэх мэт)
- Байгальд ээлтэй аялал жуулчлалыг хөгжүүлэх боломж
- Манай нутагт шинээр авто болон төмөр зам баригдвал бий болох давуу талууд
- Орон нутгийнхаа хөгжилд оруулах бидний хувь нэмэр
- Манай бүс, орон нутгаас бидэнд олгож буй боломжууд
- Манай бүс, орон нутагт хөгжүүлэх боломж бүхий брэнд бүтээгдэхүүн
- Манай орон нутагт хамгийн их эрэлт хэрэгцээтэй мэргэжил
- Орон нутгийн иргэд яагаад их хотод шилжин суурьшихыг илүүд үздэг вэ?
- Орон нутагт ажиллаж амьдрах орчин нөхцөлийг сайжруулах арга зам
- Бүс нутагт дижитал шилжилт хийх хэрэгтэй
- Бүс нутгийн хөгжил ба боловсролын хүртээмж
ХАМРАХ ХҮРЭЭ:
Ерөнхий боловсролын сургуулийн 10-12 дугаар ангийн суралцагчид.
Та бүхэн уралдааны "УДИРДАМЖ"-тай ЭНД дарж танилцана уу.
