2023 онд “Mesmerism” сувгийн Цогтоо, Мөнхүүш нар монголын ютүбэр залуусын дунд “YOUTUBE CHAMP” гэх тэмцээнийг зохион байгуулж байсан билээ.
Энэ нь ютүб платформ дээр контент бүтээгч монгол залуусын дунд зохиогдож буй хамгийн анхны тэмцээн юм.
Өмнө жилийн тэмцээнд 16 хүн оролцсон бөгөөд гадаад улсаас Түшиг, Shymelle нар цахимаар мэндчилсэн. Харин энэ жил илүү олон оролцогчтойгоор эргэн ирэх гэж байна.
Энэ удаад Binny tv, Red Burger, Мөнхцэлмэг, Musicholic girl, Zolboo tv, MVz зэрэг олон ютүбэр залуус нэмэгджээ. “YOUTUBE CHAMP”-ийн голлох тэмцээн бол бидний сайн мэдэх хайч, чулуу, даавуу тоглоом.
Оролцогчид 10 сая төгрөгийн шагналын төлөө тоглоно. Энэ жилийн шагналын сан өөрчлөгдсөн байж ч болох юм.
Голлох тэмцээнээс гадна оролцогчдыг баг болгон хувааж олон сонирхолтой тэмцээнийг явуулах ба түрүүлсэн баг шагналтай.
Өмнө жилийн багийн тэмцээнд Анар, Түвшин, Номин-Эрдэнэ нар ялалт байгуулж Хайнан явах эрхээр шагнуулсан билээ.
Мөн үүнээс гадна эл тэмцээний хамгийн чухал зүйл бол шилжин явах “Youtube Champ” бүс. 2023 оны тэмцээнд монголын шилдэг ютүбэрээр Gremix тодорсон юм.
Харин энэ жилийн “Youtube Champ”-ийн эзэн хэн байх вэ?
Нэвтрүүлэг энэ оны арванхоёрдугаар сарын 31-ны 21:00 цагт “Mesmerism”-ын албан ёсны ютүб сувгаар үнэ төлбөргүй үзэгчдэд хүрэх юм.
Эх сурвалж: Mesmerism
