- FDA-ээс мартах өвчний явцыг удаашруулах эмэнд хэрэглээнд нэвтрүүлэх зөвшөөрөл олголоо
- Тус эмийг хөнгөн хэлбэрээр өвчилсөн хүмүүс хэрэглэнэ
- Эмийн гаж нөлөө өвчтөнүүдийн 13 хувьд илэрсэн
АНУ-ын Хүнс, эмийн удирдах газраас (FDA) Альцхаймер буюу мартах өвчний явцыг удаашруулах анхны эм, “Leqembi”-д бүрэн зөвшөөрөл олголоо.
Уг эмийг зөвхөн Альцхаймерийн хөнгөн хэлбэрээр өвчилсөн, бага зэргийн танин мэдэхүйн гэмтэлтэй эсвэл тархинд нь амилоид товруу үүссэн хүмүүст хэрэглэхийг зөвшөөрсөн. Өвчний шат хүндэрсэн өвчтөнүүд эмийг хэрэглэсэн ч үр дүн гарахгүй аж.
Leqembi эм нь өвчний явцыг удаашруулах л үүрэгтэй, эмчилгээ биш гэдгийг эм үйлдвэрлэгчийн зүгээс хэлжээ. Өөрөөр хэлбэл, хөнгөн хэлбэрээр өвчилсөн хүмүүсийн мартах үе шатыг удаашруулж өгөх аж. Ингэснээр тус өвчтөн өдөр тутмын амьдралаа илүү урт хугацаанд хэвийн үргэлжлүүлэх боломжтой болж буйг онцлов.
Тус эмэнд тодорхой хэмжээний гаж нөлөө байгаа бөгөөд тархины тогтмол дүрс оношлогоогоор тогтмол хяналт тавих шаардлагатай аж. Өвчтөнүүдийн 13 орчим хувьд тархи хавдах, цус алдах зэрэг шинж тэмдэг илэрсэн. Цус шингэлэх эм ууж байгаа тохиолдолд эдгээр эрсдэлийн хувь нэмэгдэж болзошгүй юм.
FDA-ийн мэдээлснээр эдгээр гаж нөлөөтэй холбоотой болзошгүй эрсдэлийн талаар өвчтөн болон асран хамгаалагчдад сэрэмжлүүлэх үүднээс эмийн зааврын мэдээлэлд оруулсан гэв.
