Хүн хийх дуртай зүйлтэй байна гэдэг сайхан. Тэрхүү зүйлдээ улам “дурлаж”, амжилт гаргана гэдэг бүр ч сайхан. Уулын спортын зургаан удаагийн аварга, өдгөө Ази тивийн Залуучуудын аваргын тэмцээнд оролцох гэж буй дэд мастер Г.Хүрэлбаатартай хийсэн ярилцлагыг хүргэж байна.
YOLO: Өөрийгөө дэлгэрэнгүй танилцуулаач?
-Намайг Г.Хүрэлбаатар гэдэг. Одоо 18 настай. Бие тамирын дээд сургуулийн 2-р түвшиний оюутан. Уулын спортоор хичээллээд зургаан жил болж байна. Мөн мотоцикль, даун хилл дугуй, уулын цана гэх мэт экстрем спортоор өвөл зундаа хичээллэдэг.
YOLO: Ойрын хугацаанд ямар уулын спортын тэмцээнд оролцох гэж байна вэ?
-Уулын спортын Азийн тивийн Залуучуудын спорт авиралтын АШТ-ний бэлтгэлээ Хятадын тамирчидтай хамтарч хийхээр өнөөдөр (6.26) тийшээ мордоно. Энэхүү тэмцээн нь долдугаар сарын 5-9-ний хооронд Сингапур улсад зохион байгуулагдах юм.
YOLO: Энэ спорт олимпийн төрөлд нэмэгдсэн гэж сонссон?
-Тийм. Бэлтгэлээ сайн хангаад 2020 оны Токиогийн олимпод оролцох зорилготой байна. Бэлтгэлээ сайн хийвэл болохгүй зүйл байхгүй байх гэж боддог.
YOLO: Энэ спортыг яагаад сонгох болсон бэ?
-Намайг 18-р сургуулийн 10-р ангийн сурагч байхад ангийн багш С.Энхцэцэг Уулын спортын гавьяат тамирчин С.Заяа багшид хүлээлгэж өгч байсан даа. Дуртай зүйлийн минь эхлэлийг зааж өгсөн хоёр багшдаа талархаж явдаг даа.
YOLO: Уулын спорт чамд ямар давуу талыг өгсөн бэ?
-Би өмнө нь бие их муутай хүүхэд байсан. Одоо бол илүү биеийн хөгжилтэй, эрүүл чийрэг болсон. Мөн өмнө нь хичээлдээ явахаас өөр хийсэн бүтээсэн зүйлгүй энгийн л нэг хүүхэд байлаа. Одоо бол тийм биш. Мөн зан төлөвийн хувьд илүү их тэсвэр тэвчээртэй болсон. Шантрах зүйл гаралгүй л яахав, гэхдээ аль болох тэсээд тэвчээд цааш үргэлжлүүлэхийг хүсдэг.
YOLO: Энэ их эрсдэлтэй спортуудаар хичээллэхийг гэрийнхэн нь хэр хүлээж авдаг вэ?
-Аль нэгээр нь л тууштай хичээллэ гэх болсон. Гарах эрсдлийг нь тооцож мото спортыг маань таашаадаггүй. Тэдний маань ч зөв байх гээд би уулын спортоороо л дагнахаар болсон, мөн өвөлдөө цанаар гулгана.
YOLO: Ууланд авиралт гэхээр байгалийн уул хад уу, хиймэл нь үү?
-Монголын уулын авиралт дотроо гурван төрөлтэй л дөө. Байгалийн хад, хиймэл хад, мөсөн хад гээд... Бид ихэвчлэн хиймэл хаданд авирдаг, өвөлдөө Улаан цутгалан гэх мэт хөлдсөн хүрхрээн дээр авиралтаа хийдэг.
YOLO: Одоо оролцох тэмцээний хувьд аль төрлөөр нь өрсөлдөх вэ?
-Азийн залуучуудын аварга шалгаруулах тэмцээний үед бид хиймэл хаданд авиралтаар өрсөлдөнө. Тэр нь яг дэлхийн стандартын дагуу илүү барьцтай, зориулалтын хана байдаг.
Шинээр ямар нэгэн спортоор хичээллэж байгаа хүүхдүүдэд хандаж хэлэхэд нэг зүйлээрээ тууштай яваарай, хэрэв тэгж чадвал амжилтанд хүрэх магадлал бүр илүү байдаг.
Г.Хүрэлбаатар
YOLO: Бусад орны тамирчдыг өрсөлдөх чадвар болон техникүүдийг судалдаг уу?
-Би ер нь өрсөлдөгчдөө шинжих дуртай. Энэ яг юу хийж байна, надаас юугаараа илүү байна гэж хардаг. Тэр дундаа Оросын тамирчдыг судлах дуртай. Тэдний техник болон явдал, авиралт нь харьцангуй өөр байдаг. Бид баруун гараараа дээшилж байхад тэд баруун гар зүүн хөлтэйгөө хамт дээшлэх жишээний. Чадвар ч илүү байдаг.
YOLO: Уулын спортыг өсвөрийн хүүхэд залуус их сонирхдог юм шиг санагддаг.
-Тийм шүү. Манай холбоонд хичээллэхээр зөндөө хүүхэд ирдэг. Зарим нь шантрах ч, бусад нь тултал нь сайн хичээллэдэг. Шинээр ямар нэгэн спортоор хичээллэж байгаа хүүхдүүдэд хандаж хэлэхэд нэг зүйлээрээ тууштай яваарай, хэрэв тэгж чадвал амилтад хүрэх магадлал бүр илүү байдаг.
YOLO: Энэ спорт хүүхдийн өсөлтөд хэр нөлөөлдөг вэ?
-Уулын спорт өсөлтөд их нөлөөлдөг. Учир нь үргэлж дээш мацаж, сунгалт хийж байдаг.
YOLO: Чи ямар холбоонд харьяалагддаг вэ?
-Би Монголын Уулчдын Үндэсний Холбооны тамирчин. Манай холбоо Дэлхийн уулын холбооны үндсэн гишүүн юм. Тиймээс Монголдоо уулын спортын хамгийн том холбоо гэсэн үг. Холбооныхоо ах эгч нартаа маш их баярлаж явдаг. Маш их тусч хамт олон.
YOLO: Ярилцсанд баярлалаа. Тэмцээнд нь амжилт хүсье!
-Баярлалаа.
Тэд Азийн тивийн Залуучуудын спорт авиралтын АШТ-ний бэлтгэлээ хийхээр БНХАУ-ыг зорилоо
