Эрүүл, гялалзсан үстэй байх нь зөвхөн гоо сайхны асуудал биш бөгөөд арчилгааны зөв дадлын үр дүн юм. Гэвч бид өдөр тутамдаа анзааралгүйгээр үсээ гэмтээх олон алдаа гаргадаг. Энэ удаагийн нийтлэлээрээ үсээ арчлах гэхээсээ илүү гэмтээдэг алдаануудыг хүргэж байна.
1. Үсээ хэт ойр ойрхон угаах
Өдөр бүр үсээ угаах нь цэвэр мэт санагдавч байгалийн тослогийг хэт арилгаж, үсийг хуурайшуулах эрсдэлтэй. Ялангуяа хуурай, эмзэг үстэй хүмүүсийн хувьд энэ нь хугаралт, салаалалт үүсгэдэг.
2. Үсний төрөлдөө тохироогүй шампунь хэрэглэх
Тослог, хуурай, будсан зэрэг үсний төрөл бүр өөр хэрэгцээтэй. Буруу шампунь хэрэглэвэл хуйх цочрох, тослогжилт ихсэх, өнгө гандах зэрэг сөрөг үр дагавар гарна.
3. Ангижруулагчийг хуйханд түрхэх
Ангижруулагчийг үсний үзүүрт хэрэглэх ёстой байтал хуйханд түрхэх нь тослогжилтыг нэмэгдүүлж, үс унжсан харагдуулдаг. Ингэснээр үс амархан бохирдож, хэлбэрээ алддаг.
4. Нойтон үсээ ширүүн самнах
Нойтон үс хамгийн эмзэг байдаг. Энэ үед ширүүн самнах нь үсийг ихээр хугалж, сугалах шалтгаан болдог. Өргөн шүдтэй сам хэрэглэж, зөөлөн хандах хэрэгтэй.
5. Халуун багажийг хамгаалалтгүй хэрэглэх
Үс хатаагч, индүү, буржгарлагчийг дулааны хамгаалалтгүй хэрэглэх нь үсний уургийг гэмтээдэг. Үр дүнд нь үс хуурай, гялбаагүй, амархан хугарамтгай болдог.
6. Үсээ хэт чанга боох
Сүүл, гэзэг зэргийг байнга чанга боох нь үсний угийг сулруулж, уналт үүсгэнэ. Мөн дух, чамархайн орчмоор үс шингэрэхэд хүргэж болзошгүй.
7. Үсээ тогтмол тайруулахгүй байх
Үсний үзүүрийг тайруулахгүй удах нь салаалалтыг дээш тархаах шалтгаан болдог. 6–8 долоо хоногт нэг удаа тайруулснаар үс илүү эрүүл, цэгцтэй ургана.
8. Буруу хооллолтыг үл тоох
Үсний эрүүл мэнд дотроосоо эхэлдэг. Уураг, амин дэм, эрдэс бодис дутмаг хооллолт нь үсийг сул, өнгөгүй болгодог. Ус бага уух нь ч хуурайшилтад нөлөөлнө.
9. Хэт их химийн үйлчилгээ хийх
Будах, цайруулах, перм зэрэг үйлчилгээг ойр ойрхон хийх нь үсийг ихээр гэмтээдэг. Сэргээх завсарлага өгөхгүй бол үс амархан тасарч, өнгө төрхөө алддаг.
