Казахстаны нийслэл Астанад зохиогдсон “Silk Way Star” шоуны анхны улирлын ялагчаар И.Мишээл тодорлоо. Энэхүү шоу нь Азийн анхны олон улсын дууны тэмцээн болсон ба нийт 12 улс оролцсон байна.
Тодруулбал, Азербайжан, Армени, Гүрж, Малайз, Казахстан, Хятад, Киргизстан, Монгол, Тажикистан, Туркменистан, Узбекистан, Өмнөд Солонгос зэрэг улсын дуучид оролцжээ.
Тэрбээр ялагч болж шагналаа гардан аваад "Би ялагчийнхаа сэтгэгдлийг монгол эх хэлээрээ хэлмээр байна. Та нартаа маш их баярлалаа. Энэ бол зөвхөн миний дуу хоолой байгаагүй, энэ бол Монгол үндэстний дуу хоолой байсан юм шүү. Монголд үндэстэн бид өөрсдийнхөө боддогоос илүү маш их хүчтэй гэдгийг ойлгоорой. Та нартаа хайртай шүү" гэсэн юм.
Финалын шоу шууд дамжуулалтаар явагдсан бөгөөд үзэгчид цахимаар санал өгсөн ба ялагчийг 50 хувь шүүгчийн үнэлгээ, 50 хувь үзэгчдийн онлайн санал гэсэн хосолсон аргаар шалгаруулжээ. Финалын 7 шилдэг оролцогчийн дунд Казахстан (ALEM), Малайз (Yazmin Aziz), Монгол (Michelle Joseph), Хятад (Zhang Hexuan), Армени (Saro Gevorgyan), Узбекистан (Madinabonu Adilova), Гүрж (Avtandil Abeslamidze) улсуудын дуучид багтжээ.
“Silk Way Star” бол Казахстанын Ерөнхийлөгчийн Телевиз, Радио Комплекc болон Хятадын China Media Group (CMG)–ийн хамтын бүтээл бөгөөд уг тэмцээн нь соёлын солилцоо, эв нэгдлийг бэхжүүлэх зорилготой, оролцогчид үндэсний дуулах уламжлалаа, өөрийн өв соёлоо дэлхийд таниулах боломжтой байв.
“Silk Way Star” шоуны ялагч болсон И.Мишээлдээ халуун баяр хүргэе.
