А.Номин-Эрдэнэ: Би бүх амьдралаа тайз дэлгэцийн урлагт зориулна

YOLO: Том ажлын ард гарсанд баяр хүргэе. Юуны түрүүнд “Сорил” киноны гол дүрд хэрхэн сонгогдох болсноос яриагаа эхэлье.

- Баярлалаа. Би СУИС-ийн Театрын урлагийн сургуульд тайз дэлгэцийн жүжигчний 4 дүгээр курст суралцдаг. Нэг өдөр хичээл дээрээ сууж байлаа л даа. Найруулагч Б.Батдэлгэр ах надтай холбогдож уулзаад дүрийн санал тавьсан. Зохиолоо бичиж байх үедээ л хамгийн тохирох жүжигчин нь намайг гэж үзээд сонгосон гэсэн. 

YOLO: Анхны кино уран бүтээл нь гэж сонссон?

- “Сорил” кино бол миний анхны гол дүрд нь тоглосон бүрэн хэмжээний уран бүтээл. Өмнө нь Монголд хийгдэж байгаагүй mystery триллер жанрын кино. Мөн хийц продакшны талаас онцлог гэдгийг дурдмаар байна. Бас кинонд шинэ залуу жүжигчид шилдэг жүжигчидтэй хамтран тоглосон.

YOLO: Яагаад жүжигчний мэргэжлийг сонгож, суралцах болсон юм бол?

- Та бүхний мэдэж байгаачлан аав минь жүжигчин, гэрийнхэн минь бүгд л урлагийн хүмүүс. Багаасаа театрт өссөн. Тийм ч болохоор аав ээж минь л жүжигчин болъё гэсэн хүсэл эрмэлзлийг төрүүлсэн дээ.

YOLO: Хэрэв жүжигчин биш бол өөр ямар мэргэжилтэй байх байсан бэ?

- Бүжигчин болох байсан. Би Хөгжим бүжгийн сургуулийн ардын бүжгийн жүжигчний ангид сурч төгссөн. Харамсалтай нь бэртэл авсан тул бүжиглэхээ больсон. Гэхдээ бүжиглэх дуртай.

 

YOLO: Анхны бүрэн хэмжээний кинон дахь дүр нь өөрт нь хэр таалагдсан бэ?

- Бараг бүх жүжигчид л өөрийн чадварыг харуулахуйц хүчтэй, даацтай, сэтгэл хөдлөлтэй, чадвар шаардахуйц дүр хүсдэг байх. Би анхныхаа уран бүтээлийг жүжигчнийхээ ур чадварыг сорьсон уран бүтээлээр эхлүүлсэндээ баяртай байна. Намайг илүү ахиулж, урагшлуулж чадсан дүр байлаа. Олон зүйл сурсан. 

YOLO: Кино зураг авалтын үед хэцүү зүйл байв уу?

- Маш хүнд сценүүд олон байсан. Өмнө нь амьдралдаа хийж үзэж байгаагүй зүйлсийг ч хийж үзлээ. Жишээ нь гал, ус руу орж, өндрөөс унах хэсгүүд бий. Маш эрсдэлтэй хэр нь сонирхолтой санагдсан. Гэхдээ тэр бүхнээс илүү хэцүү санагдсан зүйл нь олон хоног нойргүй явах юм билээ. /инээв/

YOLO: Ер нь жүжигчний мэргэжил хатуу гэж ярьдаг. Цаашид чадварлаг жүжигчин болно гэдэгтээ итгэлтэй байгаа юу?

- Кино зураг авалтын үеэр шантарсан зүйл огт байгаагүй. Ер нь л хүнд мэргэжил шүү дээ. Хүмүүс өнгөн талд нь дурладаг байх. Би бүх амьдралаа тайз дэлгэцийн урлагт зориулна гэж шийдсэн. Тийм учраас тууштай ажиллаж, эцсийг нь үзнэ.

 

YOLO: Зураг авалт хэр хугацаанд үргэлжлэв?

- Өнгөрсөн тавдугаар сараас зургаадугаар сарын эхэн хүртэл 16 хоног үргэлжилсэн. Ихэнх хэсгүүдийг нь шөнө авсан. Бүтэн 16 хоног бараг нойргүй ажиллаж үзсэн. Гэхдээ дараа нь нэмэлт хэсгүүд авсан л даа. 

YOLO: Киноны арын алба, багийнхныхаа тухай яривал?

- “REDPOINT media”-ийн чадварлаг залуус “Сорил” киноны зураг авалтад ажиллаж дуусгаад шууд Фантастик продакшны “Зура 2: Цурам ажиллагаа” киноны зураг авалтыг хийсэн. “Цурам ажиллагаа” киноны продакшны баг бараг бүхэлдээ “Сорил” кинонд ажиллажээ. Мөн PROMIXFILM-ийн Б.Батдэлгэр найруулагчийн маань анхны дэлгэцийн уран бүтээл. Өмнө нь дандаа театрын бүтээлүүд дээр ажиллаж байсан. Бас “FILMBRIDGE” кино компанийн дистрибюшин хийж буй анхны Монгол кино гэдгээрээ онцлог юм. 

YOLO: Үзэгчдэд дүрээрээ сэтгэлд нь хоногшихыг хүсэж байна уу? Жүжигчнээр нь хүлээж аваасай гэж хүсэж байна уу?

- Inglourious Basterds киноны Christoph Waltz Hans Landa-ийн дүрээр бүх дэлхийд танигдсан. Waltz-ийг хараад Christoph Waltz биш Landa байна гэж таньдаг. Тэгэхээр дараа дараагийн уран бүтээлүүд дээрээ ч би дүрээ маш сайн гаргаж үзэгчдэд кинон дахь дүрээрээ мөнхрөхийг хүсэж байна. Хүмүүс намайг хараад Номин-Эрдэнэ биш кинонд бүтээсэн дүрийг минь санавал баярлах болно. 

 

YOLO: Үлгэр дуурайлал авдаг хүн нь хэн бэ?

- Миний аав. Аав биш уран бүтээлч талаас нь харвал аав маань уран бүтээлч хүнд байх ёстой бүх шинж чанарыг өөртөө агуулсан хүн. Аав маань дүрийг амилуулахдаа маш их боддог. Бодож байгаад түүнийгээ зургаар буулгадаг. Тэр тайз, кино бүх зүйлд дүрээрээ амьдарч чаддаг. Уран бүтээлч хүний үнэ цэнийг алдахгүй байж чаддаг уран бүтээлч болов уу гэж боддог.