Бид энэ удаагийн дугаараар 2007 оноос өнөөдрийг хүртэл тасралтгүй уран бүтээлүүдээ гаргаж, шаргуу хөдөлмөрлөсний үр дүнд өдгөө олон олон сонсогч, шүтэн бишрэгчидтэй болж, Монголын хип хоп ертөнцөд өөрийн байр суурийг олсон реппер Г. Гарьд буюу Ginjin-тэй ярилцлаа. Та бүхэн түүний талаар төдийлөн сонсож байгаагүй зүйлс болон хувь хүний үзэл бодлыг нь энэхүү ярилцлагаас унших боломжтой.
YOLO: Та яагаад тайзны нэрээ Ginjin болгож өөрчилсөн бэ? Ямар утга учиртай вэ?
- Анх 2007 оноос "EZ-Loc" нэрээр уран бүтээлээ хийж эхлээд 2013 онд Ginjin гэдэг нэрээр сольсон. Ginjin гэдэг нэр Монголчууд ч гадаадууд ч хэлэхэд амар. Утгын хувьд ч намайг илэрхийлж чадах юм шиг санагдсан. Учир нь би багаасаа л гинж, цаг гэх мэт гоёл чимэглэл, жижиг хэрэглэлд дуртай байсан.
YOLO: Хэзээнээс хип хопын ертөнцөд хөл тавьсан бэ? Реппер болох нь таны багын мөрөөдөл байв уу?
- Реппер болно гэсэн мөрөөдөл байгаагүй. Зүгээр л хөгжимд маш их хайртай байсан. Тэгээд л оролдож үзсэн. Болох юм шиг санагдсан болохоор уран бүтээл хийж эхэлсэн.
YOLO: Үлгэр жишээ авдаг уран бүтээлч бий юу?
- Яг бодоод үзсэн чинь тэр, энэ гээд оновчтой хэлэх хүн байхгүй юм байна. Бүх тууштай, авьяаслаг, хөдөлмөрч уран бүтээлчдээс үргэлж тодорхой хэмжээгээр урам зориг авдаг.
YOLO: Төдийгөөс өдий хүртэл уран бүтээлээ гаргасаар олон сонсогч фэнүүдтэй болсон. Одоогийн байдлаар нийт хэдэн дуу гаргасан бэ?
- Яг таг тоог нь сайн мэдэхгүй байна. Нийт 200 гарсан байх. Гэхдээ ихэнх нь цаг хугацааны аясаар надад ч байхгүй болсон.
YOLO: “Toos to Zoos” цомгийнхоо талаар яриач. Цомгоо яагаад ингэж нэрлэсэн бэ?
- “Toos to Zoos” гэдэг нь мэдээж тоосноос зоос руу гэсэн үг. Тоос гэдэг өөрөө юу ч үгүй хоосон зүйл шүү дээ. Юу ч үгүй хоосноос зоос руу буюу эд баялаг руу зүтгэсэн нь гэдэг утгатай. Цомогт маань нийт 14 дуу орсны 50 хувь нь шинэ, 50 хувь нь олны хүртээл болсон дуунууд байгаа.
YOLO: Өөрийн тань уран бүтээлийг сонсож буй хүмүүстэй таарахад сайхан сэтгэгдэл төрдөг байх. Анх ийм тохиолдолтой учрахад юу бодогдож, ямар сэтгэгдэл төрж байсан бэ?
- Маш гоё мэдрэмж шүү дээ. Илүү сайн уран бүтээл хийх урмыг үүнээс л авдаг даа. Анх машинтайгаа улаан гэрэл дээр зогсож байхад “Өгзөг сайхан бол зүс сайхан” дууг маань Harrier загварын машинтай хоёр охин чанга тавьчихсан сонсоод явж байсан. Тэр үеийг тодхон санадаг.
YOLO: Лойчихсон бүлэг анх хэрхэн үүсч байсан бэ? Нөхөрлөлийнхөө түүхийг хуваалцаач.
- Надад багаасаа одоог хүртэл нөхөрлөж буй сайн найзууд олон бий. Тэдний надтай адил хөгжимд сонирхолтой хэд нь нийлж хамтдаа “Лойчихсон” бүлгийг бий болгосон.
YOLO: Ер нь нөхөрлөлийн үнэ цэнэ юунд оршдог юм бол?
- Харилцан хүндлэл бол нөхөрлөлийн тулгуур багана гэж бодож байна. Бие биенээ хүндлэхгүй бол хэзээ ч чин үнэнчээр нөхөрлөж чадахгүй болов уу.
YOLO: Анхны уран бүтээлээ эргэн дурсъя. Анхны гэсэн утгаар давуу ч, сул ч тал байсан байх. Анх хэрхэн эхлэлээ тавьж байсан бэ?
- Анх 220 гэдэг дууг 220-ийн байрны найз Бэгээтэй хамт 102.5 радиогийн дэргэд байрладаг байсан жижигхэн студид бичүүлж байлаа. Тухайн үед бол би хүмүүсийн ярьдгаар ёстой л “суга” байлаа /инээв/. Одоо тэр дуугаа сонсоод өөрийгөө шоолохоосоо илүү аливаа зүйлийг тууштай хийвэл үргэлж сайжирч дээшилж болдгийг ойлгодог.
YOLO: Анх уран бүтээл хийж эхэлсэн үеэ өнөөдөртэй харьцуулбал Ginjin гэдэг хүн хэрхэн өөрчлөгдсөн бэ?
- Ginjin гэдэг хүн ерөөсөө өөрчлөгдөөгүй. Миний хувьд анх ямар байсан тэр чигээрээ л байна. Мэдээж чадварын хувьд илүү болж байна. Харин анх байсан миний үзэл бодол яг хэвээрээ.
YOLO: Дууныхаа санааг хэрхэн олдог вэ?
- Дууны санаа янз янзын байдлаар орж ирдэг. Хааяа Монголд тулгарч буй асуудлуудыг хөндөх үе бий. Хааяа гадаад гоё дуунаас санаа авах нь бий. Заримдаа зүгээр л тухайн үеийн эмоциороо ч хийх үе бий дээ.
YOLO: Таны үндсэн мэргэжил юу вэ? Яагаад энэ мэргэжлийг сонгосон бэ?
- Би аялал жуулчлал, зочид буудлын менежментээр Тайвань улсад бакалаврын зэргээ хамгаалсан. Ээж аав маань жижигхэн аялал жуулчлалын бизнестэй болохоор л энэ мэргэжлийг сонгосон байх даа. “Байх даа” гэж хэлж байгаагийн учир нь миний бодолд тэр мэргэжил бус хөгжим маань үргэлж байсан.
YOLO: Сурагч байхдаа ямар хүүхэд байсан бэ? Өсвөр насны Гинжинг тодорхойлооч.
- Ер нь их дуу цөөнтэй, даруухан хүүхэд байсан. Бас хөлбөмбөгт маш их дуртай хүүхэд байж билээ.
YOLO: Гэр бүлийнхээ тухай ярихгүй юу?
- Манай гэр бүл гэвэл аав, ээж, ах, дүү мөн би байна. Ах маань одоо Германд ажиллаж амьдардаг. Дүү маань ЕБС-д сурч байгаа энгийн л нэгэн гэр бүл байна даа.
YOLO: Стилисттэй хамтарч ажилладаг уу? Gucci-г Монгол дээлтэй хослуулсан нь их гоё зохисон гэж сонсогчид нь ам сайтай байдаг юм билээ.
- Стилист байхгүй. Өөрөө шүүгээнийхээ энд тэндээс хувцас гаргаж ирээд өмсчихдөг. Ер нь хүн хайрцагнаас гарч сэтгэх биш бүр хайрцаг гэж байхгүй гэдгийг ойлгох хэрэгтэй. Би аливаа зүйлийг үргэлж жам ёсоор нь хийх дургүй. Шинэчилж өөрчилж шинэ зүйл турших дуртай. Түүний нэг нь тэр хувцаслалт байсан. Таалагдсан хүмүүс байхын зэрэгцээ таалагдаагүй хүмүүс ч бас бий. Гэхдээ хүмүүст таалагдах эсэхээсээ илүүтэй би өөрөө өөртөө таалагдаж байсан учраас иймэрхүү байдлаар зүүсээр л байх болно.
YOLO: Найз бүсгүйтэй юу?
- Найз бүсгүй байна аа байна.
YOLO: Таны ойрын болон хэтийн зорилго юу вэ?
- Миний ойрын зорилго бол анхны тоглолтоо "супер" хийх. Хэтийн зорилго бол энэ тоглолтынхоо дараа дан гадаад хэл дээрх дуутай цомог хийх төлөвлөгөөтэй байна. Үүн дээрээ орон орны мундаг продюсер болон репперүүдтэй хамтран ажиллана. Түүнчлэн уран зохиолын ном бичих төлөвлөгөө бий.
YOLO: Хэрвээ бурхан нэг хүслийг тань биелүүлье гэвэл юу хүсэх вэ?
- Дэлхийн бүх ядуу тарчиг хүмүүсийг эн тэнцүү эд баялагтай болгож, бүгд адилхан юугаар ч дутахгүй амьдардаг болгооч гэж гуйна.
YOLO: Ярилцсанд баярлалаа.
Зургийг Ginjin-гийн Фэйсбүүк хуудаснаас
