ЗАХИДАЛ: Би ээждээ дахиад л уйлаад хэлэх үү?

  Yolo.mn сайтын редакц нь ямар нэгэн асуудал тулгарсан уншигч хүүхдүүдээс захиа хүлээн авч мэргэжлийн сэтгэл судлаач болон эмчийн хариу зөвлөгөөг уламжлан хүргэдэг. Ээлжит захиа болон зөвлөгөөг хүргэж байна.

АСУУДАЛ: Би ээждээ дахиад л уйлаад хэлэх үү?

Нийтлэлийг тань уншаад захидал бичихээр шийдлээ. Ээж маань ажлынхаа газрын хүнтэй нууцаар уулзаад байх юм. Өмнө нь би мэдээд битгий уулз нөхөр хүүхдүүд чинь байхад яагаад өөр хүнтэй уулзаад байгаа юм гэсэн чинь дахиж тэгэхгүй гэж ээж надад амласан. Тэгсэн ч саяхнаас дахиад харьцаад байгааг нь мэдсэн би яах вэ? Үнэхээр хэцүү байна би энэ тухай бодох болгондоо уйлдаг. Би дахиад л уйлаад хэлэх үү?

ЗӨВЛӨГӨӨ: Ээж, аав чинь, чи бүгд л тусдаа бодгаль хүмүүс

Сайн байна уу. Зориг гаргаж захиа илгээсэнд баярлалаа. Эцэг эхийн харилцаа өөрчлөгдөж байгааг мэдэх нь хүүхдүүдэд их том цохилт болдог. Өөрсдийгөө буруутгаж эхэлдэг. Ямар нэг аргаар ээж аавыгаа эвлэрүүлэх гэсэн оролдлого нь бүтэхгүй болохоор эцэг эхдээ, өөртөө, цаашлаад гэр бүлийн харилцаанд итгэх итгэл нь алдрахад хүрдэг. Та битгий ингэ л дээ гэж гуйсан ч ихэнх тохиолдолд ээж аав нар больдоггүй. Ингээд би ээж аавынхаа хувьд ямар ч үнэ цэнэгүй хүн юм байна гэж бодож эхэлдэг. Энэ байдлыг өөртөө битгий бий болгоорой. Яагаад гэвэл энэ чиний буруу биш, бас чи нөлөөлөхөд хэцүү асуудал.

Эцсийн дүнд чиний ээж, аав, чи бүгд л тусдаа бодгаль хүмүүс шүү дээ. Хүн бүрийн амьдралд янз бүрийн үйл явдал тохиолдоно. Хүн түүнд өөрийн оюун бодол, мэдрэмжээр хариу үзүүлнэ. Үүнийг хорьж, зөвтгөж, эсвэл буруутгаж болохгүй. Бид гэр бүлийнхнээ хамгийн сайн мэддэг гэж боддог ч бидэнд гэр бүлийнхнийхээ талаар мэддэггүй, ойлгодоггүй хэсгүүд их байдаг. Ээж нь энэ үйлдлийг хийсэн нь ямар нэг шалтгаантай ба цаг нь болохоор ээж нь өөрийгөө ойлгоно гэж найдаж байна. Хэдий ийм зүйл болсон ч чи ээж аавынхаа хувьд чухал, үнэ цэнэтэй охин нь хэвээрээ гэдгээ мартав аа. Өмнөх туршлагуудаас харахад ээж аавынхаа хоорондын харилцааг зохицуулах гэж оролдсон үед хүүхдүүд улам л сэтгэлээр унах хандлагатай байдаг. Учир нь энэ бол хүүхдийн нөлөөлж чадахаас хэтэрсэн асуудал юм. Гэсэн ч чи ямар нэг зүйл хиймээр байгаа бол эцэг эхийгээ хамт байх боломж нөхцөлийг бий болгоход өөрийн зүгээс туслах гээд оролдоод үзээрэй. Өглөө цай бэлдээд нэг ширээнд хамт хооллохыг хүсэх, хамтдаа ууланд гарах, кино үзэхийг хүсэх г.м. Гэр бүлээрээ хэрхэн хамтдаа байх боломжтойг бодоод үзээрэй. Хүчтэй байгаарай.

Сэтгэл Судлалын Үндэсний Төв

Сэтгэл судлаач

Б.Алтанцэцэг

Хэрэв чамд хэн нэгэнтэй ярилцаж чадахгүй, ганцаараа шийдвэрлэхэд бэрхшээлтэй асуудал байгаа бол yolo@mongolcontent.mn хаяг руу кириллээр, дэлгэрэнгүй, гаргацтай бичиж   цахим шуудан ирүүлснээр бид мэргэжлийн сэтгэл судлаач болон эмчийн зөвлөгөөг хүргэж чамд тус болоход хэзээд бэлэн байх болно. Мөн асуудал бүхий захиан дээрээ өөрийн НАС, ХҮЙСийг тодорхой дурдаарай.