Монгол залуучуудын авьяас дундаршгүй. Шоколадаар урласан бүтээлээрээ Монголд анх удаа үзэсгэлэн гаргасан 21 настай уран бүтээлч Н. Зөнбилэгтэй бид ярилцсан юм. Тэрээр мэргэжлийн уран барималч, эсвэл зураач биш. Харин тогооч. 15 настайгаасаа тогооч хийсэн тэрээр “Хүнсний технологич, талх нарийн боов”-ны чиглэлээр суралцаж төгссөн бөгөөд одоо “Cielo food N bar”-ийн ахлах тогоочоор ажиллаж байна.
YOLO: Энэ бүтээлээс тань яриагаа эхлэх үү?
-Энэ бүтээлийг нэг залуу 40 минутын турш харж суусан. Түүнд юу бодогдож, ямар сэтгэгдэл төрснийг хэн ч мэдэхгүй. Энэ зургийг хараад яаж хүлээж авах нь тухайн хүний харах өнцгөөс л шалтгаална. Харин миний хувьд энэхүү зургаараа эрч хүч болон тайван байдлын хослолыг илэрхийлэхийг зорьсон.
YOLO: Анх яагаад шоколадаар бүтээл хийе гэж бодсон бэ?
-Миний мэргэжил тогооч. Тэр дундаа голдуу дессэрт хийдэг учир шоколад миний салшгүй нэгэн хэсэг болсон. Тиймдээ ч шоколадаар бүтээл хийхийг олон жилийн өмнөөс хүсэж байсан. Монголд шоколадны чиглэлээр мэргэжлийн сургалт байдаггүй. Өөрөө бие дааж суралцах хэрэгтэй болсон. Анх 3 жилийн өмнө шоколадаар бүтээл хийж эхэлсэн.
YOLO: Саяхан болсон үзэсгэлэнг тань очиж сонирхоход зарим бүтээлүүд хагарч, эвдэрсэн байсан. Энэ юунаас болсон бэ?
-Тээвэрлэлтийн явцад багагүй алдаа гарсан. Өвлийн -30 градусын хүйтэнд шоколад зөөх амаргүй ажил. Мөн үзэсгэлэнг үзсэн хүмүүс ч зарим бүтээлийг гэмтээсэн байна лээ. Үзэгч хүүхдүүд хазаж, гар хүрснээс зарим бүтээл хагарч цуурсан.
YOLO: Үзэсгэлэн дууссаны дараа бүтээлүүдээ яасан бэ? Мөн бүтээгдэхүүний хадгалалтын талаар мэдээлэл өгөөч.
-Одоогоор нэлээн хэдэн бүтээлүүд эзэнтэй болоод байна. Заримыг нь хадгалж, хайлуулж өөр бүтээл хийнэ гэж бодож байгаа. Хадгалалтын тал дээр тодорхой горим, температуртай өрөөнд хадгална. Миний тооцоолсноор тодорхой температур болон орчныг нь бүрдүүлчихвэл олон жил хадгалах ч боломжтой.
YOLO: Шоколадаар бүтээл хийхэд ямар бэрхшээлүүд тулгардаг вэ?
-Мэдээж бэрхшээлгүй зүйл гэж үгүй. Хэцүү юм болгоныг тоочоод байвал барагдахгүй. Шоколад нь бүтээл хийхэд тийм ч тохиромжтой материал биш болохоор хүндрэлтэй тохиолдол их гардаг.
YOLO: Таныг хүүхэд байхад байсан шоколадны амт одоогийн шоколадныхаас юугаараа ялгаатай байна вэ?
-Мэдээж хамгийн амттай шоколад бага байхад байсан. Одоогийн шоколадны амт бага байх үеийнхийг гүйцэхгүй.
YOLO: Ойрын хугацаанд ямар нэгэн уралдаан тэмцээнд орохоор бэлдэж байгаа юу?
-Ойрын хугацаанд уралдаан тэмцээнд орох төлөвлөө байхгүй. Учир нь эхлээд өөрийгөө илүү их боловсруулж, сурах зүйл их байна.
YOLO: Бүтээлээрээ юу илэрхийлэхийг хүсдэг вэ?
-Ер нь бол янз бүрийн агуулгатай бүтээл хийдэг. Шоколад нь хайр, аз жаргалын бэлэг тэмдэг болсон амттан учраас ихэвчлэн эерэг, дулаахан сэтгэгдэл төрүүлэхээр бүтээл хийхийг зорьдог.
YOLO: Анхны бүтээл гэдэг хүнд мартагддаггүй шүү дээ. Таны анхны бүтээлийн тухайд?
-Хамгийн анхны бүтээл нэг мод байсан. Харахад хугархай модны мөчир түүн дээрээ цагаан цэцэгтэй.
YOLO: Зургийнхаа сэдвийг хаанаас олж авдаг вэ?
-Өөрийнхөө мэдрэмж дээр тулгуурлан зохиомжилж хийдэг.
YOLO: Бүтээлээ хийхдээ ямар багаж ашигладаг вэ? Мөн шоколаднаас өөр ямар материал ашиглан бүтээл хийдэг вэ?
-Гал тогоонд хэрэглэдэг тогоочийн хэрэгслээр хийгдсэн. Материалын хувьд хүнсний будаг болон шоколадны үндсэн орцуудыг салгаж ашигладаг. Мөн какао болон түүнээс гаргаж авдаг тосыг хэрэглэнэ.
YOLO: Хамгийн их хугацаа зарцуулсан бүтээлээсээ яриач.
-Бүтээл болгоныг ялгаварлаж болохгүй. Миний гараас бүгдээрээ тодорхой хэмжээний цаг зарцуулсны эцэст бүтээл болсон. Харин хамгийн удаан оролдуулсан бүтээл гэвэл титаник хөлөг онгоц.
YOLO: Таны цаашдын зорилго?
-Цаашдын зорилго бол өөрийн ажиллаж буй салбараараа дахин сурч боловсрох.
YOLO: Одоогоор нийт хэдэн бүтээл урлаад байна вэ?
-Нийт 40 гаруй бүтээл урласан байх. Яг нарийвчлан тоолоогүй ээ.
YOLO: Хийж байгаа зүйл тань бүтэлгүйтэх үе зөндөө л тулгарч байсан байх. Тэр үед яадаг вэ?
-Дахин шинээр эхэлдэг. Бүтэлгүйтэл маш их гардаг. Жишээ нь, шоколадан цэцэг хийгээд түүнийг нэг зүйлтэй наахын тулд шоколадаар наахад хугарч унах тохиолдол бишгүй гардаг. Нэг л зүйл бүтэлгүйтэхэд дахин шинээр эхлэх болдог.
YOLO: Тусалж дэмждэг хүмүүстээ хандаж хэлмээр үг бий юү?
-Миний хажууд надад үргэлж итгэж, дэмжиж байдаг хүмүүстээ маш их баярлалаа. Тэр хүмүүсийн ачаар л өдий зэрэгтэй явж байна даа.
YOLO: Ярилцсанд баярлалаа. Уран бүтээлийн өндөр амжилт хүсье!
-Баярлалаа.
