ЗАХИДАЛ: Яаж яриа өрнүүлэх вэ?

  Yolo.mn сайтын редакци нь ямар нэгэн асуудал тулгарсан уншигч хүүхдүүдээс захиа хүлээн авч мэргэжлийн сэтгэл судлаач болон эмчийн хариу зөвлөгөөг уламжлан хүргэдэг. Ээлжит захиа болон зөвлөгөөг хүргэж байна.

АСУУДАЛ: Яаж яриа өрнүүлэх вэ?

Би 17 настай хүү. Заримдаа хүнтэй ярихад их хэцүү байх юм. Ганц хоёр үг солиод л яриа өндөрлөнө. Танихгүй хүн бүү хэл таньдаг хүнтэйгээ ч сайн ярьж чадахгүй юм. Ярилцаж буй хүн ч тус ярианд сонирхолгүй, залхсан нь нүүрнээс нь илт харагдах юм.

Анги хамт олныхоо дунд хөгжилтэй, яриа хөөрөөтэй хөвгүүдийг хараад хааяахан атаархах юм. Тэд цаанаасаа л нэг баяр хөөр түгээсэн, хамт байхад хэзээ ч уйдхааргүй хүүхдүүд. Гэвч тэдэн шиг бэлэн яриа амнаас огт гарахгүй, үргэлж л зөв, буруу зүйл яривал яах бол гэж бодно. Угаасаа ярианы сэдэв ч олддоггүй юм доо. Тэгээд л харилцан яриа маш хурдан дуусч, тэд надаас дайжин зугтдаг. Бодвол хажууд юм ярилгүй байх нь эвгүй л байдаг байх. Үүнээс болоод ноомой, эмо гээд л олон хоч авна. Мөн сайн охин маань ч дөлөөд байх болсон. Та бүхэнд гол асуултаа тавихад:

• Би яаж удаан яриа өрнүүлэх вэ?
• Яаж сонирхолтой яриа өрнүүлэх вэ?

АСУУДАЛ: Хэн их ярина, тэр илүү сайн ярьдаг болно

Сайн байна уу? Захидал илгээсэнд баярлалаа. Юуны түрүүнд чи ярилцах үедээ “Энэ хүн надаас залхвал яана” гэж санаа зовдог гэсэн байна. Санаа зовоод эхлэхээр тэр хүний ярьж байгаа яриа, сэдэвтээ анхаарахаас илүү өөртөө анхаараад эхлэнэ. Өөрийгөө л бодоод өөртөө төвлөрөөд байгаа хүн бусадтай үр дүнтэй харилцаа үүсгэж чаддаггүй.

Тэр хүмүүс чамаас залхаад байгааг яаж мэдэж байна вэ? Хэрвээ энэ зөвхөн чиний бодол бол энэ нь алдаатай бодол бөгөөд үүнийг арилгаж байж чи илүү өөртөө итгэлтэй, удаан яриа өрнүүлдэг болно шүү.

Мөн чи үзэх дуртай кино, уншсан ном гэх мэт өөрийнхөө сонирхдог зүйлийн талаар эхлээд хамгийн дотно, чамайг анхааралтай сонсох хэн нэгэнтэй яриа өрнүүлж бие халаалт хийгээрэй. Хүн сонирхдог зүйлийнхээ талаар ярьж байх үедээ дараа нь юуг нь ярих вэ зэргийг бодолгүйгээр хар аяндаа л эрч хүчтэй, удаан хугацаанд ярьчихсан байдаг. Тиймээс өөрийн сонирхдог зүйлсийн талаар, магадгүй чамтай адилхан сонирхолтой хүнтэйгээ яриа өрнүүлбэл яриа чинь амжилттай болоод эхэлнэ. Мэдээж эхэндээ эвгүй санагдаж бүтэшгүй мэт мэдрэмж төрж магадгүй. Гэсэн ч бууж өгөлгүй үргэлжлүүлээд байгаарай. Ярих гэдэг яг л дугуй унах, усанд сэлэхтэй ижил хүний оролдож, давтаж байж хөгжүүлдэг ур чадвар юм шүү. Хэн их ярина, тэр илүү сайн ярьдаг болно. Тиймээс шууд хамгийн сайн, хөгжилтэй харилцагч байх гэж хичээлгүй алхам алхмаар өөрийгөө хөгжүүлэх нь зөв шүү. Чамд амжилт хүсье! Чи чадна.

Сэтгэл Судлалын Үндэсний Төв

Туслах сэтгэл судлаач

Ц.Пүрэвсүрэн

Хэрэв чамд хэн нэгэнтэй ярилцаж чадахгүй, ганцаараа шийдвэрлэхэд бэрхшээлтэй асуудал байгаа бол yolo@mongolcontent.mn хаяг руу кириллээр, дэлгэрэнгүй, гаргацтай бичиж   цахим шуудан ирүүлснээр бид мэргэжлийн сэтгэл судлаач болон эмчийн зөвлөгөөг хүргэж чамд тус болоход хэзээд бэлэн байх болно. Мөн асуудал бүхий захиан дээрээ өөрийн НАС, ХҮЙСийг тодорхой дурдаарай. Жич: Бид мэдээллийг чандлан хадгалах бөгөөд хариуг сайтад нийтлүүлэхийг хүсэхгүй тохиолдолд захидалдаа дурдана уу. Бид хариу зөвлөгөөг 7-10 хоногийн дараа хүргэх болно.