АНУ-ын Элчин сайдын яамнаас 2027-2028 оны Hubert H. Humphrey Fellowship хөтөлбөрт оролцох хүсэлтэй мэргэжилтнүүдээс өргөдөл хүлээн авч эхэлжээ. Энэхүү хөтөлбөр нь Fulbright солилцооны хөтөлбөрийн нэг хэсэг бөгөөд ажлын туршлагатай, манлайлах ур чадвартай мэргэжилтнүүдийг АНУ-д нэг жилийн хугацаанд мэргэжлийн болон бодлогын түвшний сургалт, туршлага хуримтлуулах боломжийг олгодог.
Hubert H. Humphrey Fellowship нь эрдмийн зэрэг олгодоггүй ч оролцогчдод АНУ-ын их сургуулиуд болон байгууллагуудад суралцаж, ажиллах туршлага хуримтлуулах боломж олгодог хөтөлбөр юм. Хөтөлбөрийн хүрээнд оролцогчид бодлого боловсруулах үйл явцтай танилцаж, өөрийн салбарын америк мэргэжилтнүүдтэй хамтран ажиллаж, олон улсын мэргэжлийн сүлжээгээ өргөжүүлдэг.
2027-2028 оны үндсэн чиглэлүүд
Энэ удаагийн Humphrey Fellowship дараах зургаан үндсэн чиглэлээр оролцогч шалгаруулна.
- Харилцаа холбоо ба сэтгүүл зүй
- Эрх зүй ба засаглал
- Байгалийн нөөцийн бодлого
- Төрийн болон эдийн засгийн бодлого
- Нийгмийн эрүүл мэндийн бодлого ба удирдлага
- Технологийн бодлого ба удирдлага
Хэн хамрагдах боломжтой вэ?
Монгол Улсаас өргөдөл гаргагчид дараах үндсэн шаардлагыг хангасан байх ёстой.
- Монгол Улсын иргэн бөгөөд Монголд оршин суудаг байх
- Дөрвөн жилийн бакалаврын зэрэгтэй байх
- Бакалаврын зэрэг авснаас хойш хамгийн багадаа таван жилийн бүтэн цагийн ажлын туршлагатай байх
- Удирдах албан тушаал эсвэл бодлого боловсруулах чиг үүрэгтэй ажил эрхэлдэг байх
- TOEFL, Duolingo эсвэл IELTS-ийн 72/100/6.0 ба түүнээс дээш оноотой байх
- Хөтөлбөр дууссаны дараа эх орондоо дор хаяж хоёр жил ажиллах үүрэг хүлээх боломжтой байх.
Хэн өргөдөл гаргах боломжгүй вэ?
Дараах хүмүүс хөтөлбөрт хамрагдах боломжгүй.
- Саяхан их сургууль төгссөн хүмүүс
- Удирдах үүрэггүй их сургуулийн багш, судлаачид (зарим онцгой тохиолдлыг эс тооцвол)
- АНУ-ын давхар иргэншилтэй эсвэл байнгын оршин суух эрхтэй хүмүүс
- IELTS, TOEFL эсвэл Duolingo-ийн шаардлагатай оноонд хүрээгүй өргөдөл гаргагчид.
Humphrey Fellowship нь олон улсын мэргэжилтнүүдийн манлайллыг хөгжүүлэх, бодлого боловсруулах мэдлэгийг нэмэгдүүлэх, АНУ-ын байгууллагуудтай хамтран ажиллах туршлага олгох зорилготой нэр хүндтэй хөтөлбөрүүдийн нэг бөгөөд 1978 оноос хойш дэлхийн 177 орны 7,100 гаруй төгсөгчийг бэлтгээд байна.
