Жил бүр олон мянган оюутан БНХАУ-ын Засгийн газрын болон их сургуулийн тэтгэлэгт хамрагдах зорилгоор бэлтгэлээ базаадаг. Хэдийгээр өргөдөл хүлээн авах хугацаа намар эсвэл өвөл эхэлдэг ч хамгийн чухал бэлтгэл зуны улиралд хийгддэг. Энэ хугацааг зөв ашиглаж чадвал бусдаас илүү өрсөлдөхүйц материал бүрдүүлэх боломжтой.
1.Юуны өмнө суралцах гэж буй мэргэжил, их сургуулиудаа сайтар судлаарай. Аль сургууль ямар хөтөлбөрөөр элсэлт авч байгаа, англи эсвэл хятад хэл дээр сургалт явуулдаг эсэх, ямар шаардлага тавьдаг зэрэг мэдээллийг урьдчилан мэдэх нь материал бүрдүүлэх ажлыг илүү хялбар болгоно.
2.Хятад хэлээр суралцахаар төлөвлөж байгаа бол HSK шалгалтын бэлтгэлдээ онцгой анхаараарай. Өдөр бүр тогтмол шинэ үг цээжилж, сонсгол, уншлага, бичгийн дасгал хийснээр шалгалтын оноогоо мэдэгдэхүйц ахиулах боломжтой. Англи хэлээр суралцах бол IELTS эсвэл TOEFL-ийн оноогоо сайжруулахад зуны амралтыг зориулаарай.
3.Өөрийн голч дүн, дүнгийн хуулга болон сургалтын амжилтаа нягталж үзэх нь мөн чухал. Зарим тэтгэлэг сурлагын өндөр үзүүлэлтийг гол шалгуур болгодог тул шаардлагатай бол тухайн сургуулиасаа албан ёсны бичиг баримтаа эртнээс бэлтгэж эхлэх хэрэгтэй.
4.Мөн багш, эрдэм шинжилгээний удирдагч, ажил олгогчоос авах тодорхойлох захидлаа урьдчилан ярилцах нь зүйтэй. Сүүлийн мөчид хүсэлт тавих нь чанартай тодорхойлолт авах боломжийг бууруулдаг учир зуны турш энэ асуудлыг шийдэх нь хамгийн зөв алхам юм.
5.Тэтгэлгийн материалд чухал байр суурь эзэлдэг судалгааны төлөвлөгөө эсвэл суралцах зорилгын эсээгээ хэд хэдэн удаа засварлаж сайжруулаарай. Яагаад тухайн мэргэжлийг сонгосон, ирээдүйн зорилго тань юу болох, Хятадад суралцах нь таны хөгжилд хэрхэн нөлөөлөхийг тодорхой бөгөөд үнэмшилтэй илэрхийлэх хэрэгтэй.
6.Зуны амралтаар сайн дурын ажил, сургалт, эрдэм шинжилгээний хурал, тэмцээн уралдаанд оролцох нь давуу тал болдог. Эдгээр нь зөвхөн намтрыг баяжуулахаас гадна таны идэвх санаачилга, манлайлах ур чадварыг харуулах чухал нотолгоо болдог.
7.Бичиг баримтын хүчинтэй хугацаагаа мөн шалгаарай. Паспортын хүчинтэй хугацаа дуусах гэж байгаа бол шинэчлэх, иргэний үнэмлэх болон бусад шаардлагатай баримтаа бүрдүүлэх нь дараа нь үүсэх эрсдэлийг багасгана.
8.Хятад улсын боловсролын тогтолцоо, соёл, өдөр тутмын амьдралын талаар урьдчилан судлах нь шинэ орчинд хурдан дасан зохицоход тусална. Их сургууль, хот, нийтийн тээвэр, амьдрах өртөг зэрэг мэдээллийг мэддэг байх нь бодит төлөвлөгөө гаргахад хэрэгтэй.
