Холливудын хамгийн хайр татам, олны анхаарлын төвд байдаг хосуудын нэг болох жүжигчин Tom Holland, Zendaya нар албан ёсоор гэрлэсэн гэдгээ зарласан билээ. Tom Holland энэ оны зургаадугаар сард өгсөн ярилцлагадаа тэд хэдэн сарын өмнө нууцаар хуримаа хийсэн болохоо анх удаа олон нийтэд дэлгэсэн байна.
"Хүн-аалз"-ын киноноос эхэлсэн тэдний хайрын түүх хэрхэн өрнөснийг эргэн харцгаая.
2016-2017: Нөхөрлөлөөс эхэлсэн холбоо
Тэд 2016 онд Spider-Man: Homecoming киноны зураг авалтын үеэр танилцаж, Peter Parker болон MJ-ийн дүрийг бүтээжээ.
Кино нээлтээ хийсний дараа тэднийг болзож байгаа гэх цуурхал олонтаа гарч байсан ч хосууд "Бид маш сайн найзууд" хэмээн удаа дараа үгүйсгэдэг байв. Тэр үед Zendaya ноцтой харилцаанд орохоос илүүтэй өөрийгөө таньж мэдэх нь чухал гэж ярьж байсан юм.
2021: Нууц үнсэлт бүхнийг өөрчилсөн нь
Олон жилийн нөхөрлөлийн дараа 2021 оны долоодугаар сард папарацциуд тэднийг Лос-Анжелест Tom-ийн машин дотор үнсэлцэж байгааг гэрэл зурагт буулгаснаар хосын харилцаа албан ёсоор ил болов.
Удалгүй Tom Holland Zendaya-гийн төрсөн өдөрт зориулан "Миний MJ, төрсөн өдрийн мэнд хүргэе" хэмээн бичиж, хайртайгаа олон нийтэд анх удаа илчилсэн билээ.
Хэдийгээр харилцаагаа нуухаа больсон ч тэд хувийн амьдралаа хэвлэл мэдээллийн хэрэгслээс үргэлж хол байлгахыг хичээсээр ирсэн юм.
2024-2026: Карьер, хайр, шинэ гэр бүлийн гишүүн
Хосууд карьерын хувьд ч бие биеийнхээ хамгийн том дэмжигчид байв. Тэд Christopher Nolan-ы найруулсан "The Odyssey" болон Zendaya-гийн тоглосон "The Drama" зэрэг шинэ уран бүтээлүүд дээрээ бие биеэ хэрхэн дэмжиж, бахархаж байснаа цахим хуудсаараа дамжуулан хуваалцаж байлаа. Zendaya нэгэн ярилцлагадаа:
"Би хамгийн сайн найз, хайртай хүнтэйгээ өдөр бүр хамт ажиллаж байна. Бид бүр нохдоо хүртэл зураг авалтын талбайд авчирдаг. Яг л гэр бүлийн уур амьсгалтай байдаг" гэжээ.
Мөн тэд саяхан Zendaya-гийн төрсөн хот болох Oakland-оос дахин нэг нохой үрчилж авч, гэр бүлээ бүл нэмжээ.
2025-2026: Сүйн бөгж, AI цуурхал, нууц хурим
2025 оны нэгдүгээр сард болсон Golden Globe Awards-ын улаан хивсэн дээр Zendaya ядам хуруундаа томоохон бөгж зүүж ирсэн нь тэднийг сүй тавьсан гэх яриаг улам хүчтэй болгосон юм.
Харин 2026 оны гуравдугаар сард тэдний хуримын тухай хиймэл оюун ухаанаар бүтээсэн хуурамч зургууд цахим орчинд тархаж, олон мянган хүнийг төөрөгдүүлээд амжив.
Zendaya энэ талаар Jimmy Kimmel Live! нэвтрүүлэгт оролцохдоо хүмүүс түүнд хуримын баяр хүргэж байсан ч тархсан зургууд бодит бус, AI-аар бүтээсэн гэдгийг тайлбарласан байна.
Гэвч уг цуурхал бүрэн худал байгаагүй аж.
Tom Holland зургаадугаар сард өгсөн ярилцлагадаа эмээ нь хуурамч зургуудыг хараад түүн рүү залгасан тухай дурсаж, "Гэр бүлийнхэнтэйгээ энэ тухай тайлбарлах шаардлага байгаагүй. Учир нь тэд бүгд хурим дээр минь байсан" хэмээн санамсаргүйгээр нууцаа дэлгэсэн юм.
