-Өнгөрч буй долоо хоногт болсон онцлох үйл явдлуудыг тоймлон хүргэж байна-
НОЙРОО ХАСАН АЖИЛДАА ОРСОН ХОТЫН ШИНЭХЭН ДАРГА
Долоо хоногийн эхэнд Хотын шинэ даргыг сонгох НИТХ-ын хуралдаан болсон. Энэ хуралдаанд МАН-ын Удирдах зөвлөлийн гишүүн, Нарийн бичгийн дарга, СДМЗХ-ны ерөнхийлөгч Б.Пүрэвдагвыг нэр дэвшүүлж, олонхын саналаар дэмжсэн юм.
Улмаар Ерөнхий сайд Н.Учрал түүнийг батламжилж, нийслэлийн Засаг дарга бөгөөд Улаанбаатар хотын Захирагчаар томилсон.
Тэрбээр сэтгүүлчдэд мэдээлэл өгөх үеэрээ зургаадугаар сарын 18-нд хуримаа хийх гэж байсан боловч хойшлуулан байж энэ ажлыг авч буйгаа онцолж байв. Мөн салбар салбаруудын ажилтай танилцаж байгаа тул шөнө унтах ч завгүй байгаа хэмээн дурдаад амжсан.
ОРОН СУУЦНЫ 22 ДАВХАРТ ГАЛ ГАРАВ
Нийслэлийн ХУД-ийн 15-р хороо, Цэнгэлдэх хотхоны байранд гал гарсан. Алба хаагчид гарсан галыг хоёр цагийн дотор бүрэн унтраасан. Гал түймрийн голомтоос алба хаагчид урьдчилсан байдлаар 36 хүүхэд, 73 том хүнийг аюулгүй бүсэд гаргаж, аюулгүй байдлыг ханган ажилласан юм.
Гал унтраах ажиллагаанд нийслэлийн хүрээний Гал түймэр унтраах, аврах 10, 14, 26, 63 дугаар анги, Аврах ангийн нийт 70 гаруй алба хаагч, гал унтраах 20 автомашин, техник хэрэгсэлтэйгээр оролцсон.
1072 ХУВЬЦААНЫ НОГДОЛ АШГИЙГ ХУУЛЬ ЁСНЫ ӨВЛӨГЧИД ШИЛЖҮҮЛЭХ ТУХАЙ
1072 хувьцаа, түүнд ногдох ногдол ашгийг хууль ёсны өвлөгчид шилжүүлэх асуудлаар “Эрдэнэс Тавантолгой” ХК, Үнэт цаасны төвлөрсөн хадгаламжийн төв, Монголын Нотариатчидын танхим хамтран мэдээлэл өгсөн.
2011 оны 3-р сарын 31-ний өдрөөс Монгол Улсын иргэдэд 1072 хувьцааг эзэмшүүлж эхэлсэн. Засгийн газраас 2026 оны 4-р сарын 29-ний өдөр 1072 хувьцааны өв залгамжлалын эрхийг шилжүүлэх шийдвэр гаргасан. Засгийн газрын тогтоолд заасны дагуу 6-р сарын 1-нээс иргэдэд 1072 хувьцааг өвлүүлэх, ногдол ашгийг хууль ёсны өвлөгчид шилжүүлэх ажил эхэлнэ.
ЦООНОГТ УНАСАН ХҮҮХДИЙГ 59 ЦАГИЙН ДАРАА ГАРГАСАН Ч АМИА АЛДСАН БАЙВ
Төв аймгийн Заамар сумын нутаг дэвсгэрт уурхайн цооногт унасан гурван настай хүүхдийг 59 цагийн дараа гаргасан авсан ч амиа алдсан байжээ.
Хүүхэд 40-50 метрийн гүн нүхэнд унасан дуудлага тавдугаар сарын 27-ны өдрийн 13:40 цагт ирсэн. Тухайн цооногийн дэргэд 45м өргөн, 70м урт, 32м гүнтэй нүхийг 3 дамжлагатай налуу ам гарган шатлан ухаж, хөндлөн малталтын ажлыг тавдугаар сарын 28-ны өдрийн 22:00 цагт эхлүүлээд байв.
Энэ сарын 30-ны 00:23 цагт буюу хүүхэд цооногт унаснаас хойш 59:46 цаг, ажиллагааг эхлүүлснээс хойш 55:19 цагийн буцалтгүй нэрвэгдэгчийг гарган, Цагдаагийн байгууллагад хүлээлгэн өгчээ.
