Ким Су Хёныг талийгаач Ким Сэ Ронтой насанд хүрээгүй байхад нь үерхэж байсан гэж буруутгасан YouTuber баривчлагдсаны дараа салбарынхны анхаарал Ким Су Хён Disney+ платформын “Knockoff” цувралаар эргэн ирэх эсэхэд төвлөрч байна.
Сөүлийн шүүх мягмар гарагт YouTube-ийн Garo Sero Institute сувгийг ажиллуулдаг HoverLab компанийн тэргүүн Ким Сэ Үйг нэр төрд халдсан болон хиймэл оюун ухаан ашиглан нотлох баримт хуурамчаар үйлдсэн гэх үндэслэлээр баривчлах зөвшөөрөл олгожээ.
Үүний дараа Ким Су Хён дэлгэцэнд эргэн ирэх үү гэсэн асуулт олон нийтийн дунд дахин хөндөгдөж эхэлсэн байна. Учир нь түүнтэй холбоотой маргааны улмаас Disney+ компанийн анхны бүтээл болох “Knockoff” цувралын нээлтийг хойшлуулсан юм.
Ким Су Хён нэг жилийн өмнө маргаанд холбогдохоосоо өмнө уг цувралын гол дүрд тоглохоор төлөвлөгдсөн байв. Тэрээр эхний улирлын зураг авалтаа бүрэн дуусгасан ч стриминг үйлчилгээ үзүүлэгч компани цувралыг гаргах болон хоёрдугаар улирлын зураг авалтыг тодорхойгүй хугацаагаар хойшлуулах шийдвэр гаргасан юм.
Disney+ компани 1997 оны Азийн санхүүгийн хямралын үеийг харуулсан инээдмийн төрлийн “Knockoff” цувралд ойролцоогоор 60 тэрбум вон зарцуулжээ.
Ким Су Хёны агентлаг Gold Medalist лхагва гарагт шүүхийн шийдвэр нь Кимийн эсрэг дэвшүүлсэн буруутгал болон нотлох баримтууд худал байсан гэдгийг харууллаа гэж мэдэгджээ. Гэсэн хэдий ч “цувралын нээлтийн талаар одоогоор шинэ мэдээлэл байхгүй” хэмээв.
Иймээс Ким Су Хён дэлгэцэнд эргэн ирэх эсэх нь одоогоор тодорхойгүй хэвээр байна.
