Сүүлийн жилүүдэд эрүүл хооллолтын чиг хандлага нэмэгдэхийн хэрээр бүйлс (алмонд) нь “супер" хүнсний нэг хэмээн нэрлэгдэх болсон. Судалгаануудын үр дүнгээс харахад бүйлсийг өдөр тутмын хоол хүнсэндээ зохистой хэмжээгээр оруулах нь хүний биед олон төрлийн эерэг нөлөө үзүүлдэг байна.
Бүйлс нь уураг, эслэг, эрүүл тос (ялангуяа ханаагүй тос), Е витамин, магни зэрэг чухал шим тэжээлээр баялаг. Эдгээр бодисууд нь зүрх судасны үйл ажиллагааг дэмжиж, холестерины түвшинг бууруулахад тустай гэж үздэг. Мөн тогтмол хэрэглэх нь цусан дахь сахарын түвшинг тогтвортой байлгахад дэмжлэг үзүүлж, 2-р хэлбэрийн чихрийн шижин үүсэх эрсдэлийг бууруулах боломжтой.
Түүнчлэн бүйлсэнд агуулагдах антиоксидантууд нь эсийн гэмтлээс хамгаалж, арьсны эрүүл байдлыг хадгалахад чухал үүрэг гүйцэтгэдэг. Жингээ барих, бууруулах зорилготой хүмүүст ч мөн тохиромжтой хүнс бөгөөд удаан хугацаанд цатгалан мэдрэмж төрүүлдэг нь хэт их идэхээс сэргийлдэг.
Гэхдээ их идэх тусам сайн гэсэн үг биш. Мэргэжилтнүүдийн зөвлөснөөр өдөрт дор хаяж 3-5 ширхэг, цаашлаад 20–30 ширхэг бүйлс хэрэглэх нь зохистой. Хэтрүүлэн хэрэглэх нь илүүдэл калори авч, жин нэмэгдэх, зарим тохиолдолд хоол боловсруулахад ачаалал өгөх эрсдэлтэй.
Мөн давс, сахар нэмсэн боловсруулсан бүйлснээс илүүтэйгээр түүхий эсвэл бага зэрэг шарсан, нэмэлтгүй хувилбарыг сонгох нь эрүүл мэндэд илүү ач холбогдолтой.
Эх сурвалж: Today
