Олон улсын охидын эрхийг хамгаалах өдрийг тохиолдуулан Хүүхдийн Төв Номын Сан, Монголын Урлагийн Сэтгэл Заслын Мэргэжлийн Холбоотой хамтран "DREAM BIG" өдөрлөг арга хэмжээг өнөөдөр өглөө зохион байгууллаа.
Өдөрлөгийн үеэр охидын авьяас, ур чадварыг харуулсан уран бичлэг, гар урлал, ном бүтээлийн үзэсгэлэнгүүдийг байрлуулсан байв.
Өнөөдрийн өдөрлөгт:
- Уран бичлэгийн төрлөөр Дархан-Уул аймгийн 16-р сургуулийн 12в ангийн сурагч Б.Намуунзаяа
- Гар урлал, нэхмэлийн төрлөөр Путонхуа сургуулийн 7в ангийн сурагч М.Маралмаа
- Хүүхдийн зохиолч Намдагийн зээ охин болох Улаанбаатар хотын Плехановын сургуулийн 8в ангийн Б.Наранжин өөрийн зохиосон номоороо оролцжээ.
100 гаруй охид оролцсон уг арга хэмжээ Хүүхдийн Төв Номын сангийн байранд "Охидын хүч бол нийгмийн хүч" гэсэн уриаг 3 удаа хэлснээр ёслол төгөлдөр эхэллээ.
Үйл ажиллагаа Монголын хүүхдийн ордны "Цэцэг" хамтлаг дуу дуулж, Хан-Уул дүүргийн соёлын ордны "Уран дэг" хамтлагийн бүжигчин охины үзүүлбэрээр нээлтээ хийв.
Үүний араас Монголын Урлагийн мэргэжлийн сэтгэл заслын холбооны тэргүүн Арт терапист Б. Бэрцэцэг “Шинэ зууны ухаалаг хүүхдүүд: Найзтай байх” сэдвээр илтгэл тавьж мөн охидын дотно, ганцаарчилсан яриа өрнүүллээ.
Түүний зөвлөсөн найзтай байх амархан арга:
- Бусадтай найрсгаар инээмсэглэн мэндэлж байх
- Бусдад санаа тавьж халамжилж байх
- Бусадтай илүү зүйлээ хуваалцаж байх
- Уур бухимдлаа эергээр удирдах
- Бусдын талаар хэн нэгэнд муугаар ярихгүй байх
- Тоглож байхдаа найзыгаа тоглоомдоо татан оруулах, яриандаа мөн оролцуулах
- Бусдаас дуртай зүйлийнх нь талаар асууж байх
Зөвлөгөөний дараа үзэсгэлэнгээ гаргасан гурван охин өөрсдийн түүхээ ярьж, бүтээлийнхээ талаар илтгэл тавилаа.
Монголын Сонгодог Уран зохиол сэдэвт “Миний бахархал” монгол уран бичлэгийн үзэсгэлэнгээ танилцуулсан Намуунзаяа охин нь:
- Монголын сайхан бичигтэн олон улсын уралдааны тэргүүн байрны шагналт
- Дархан-Уул аймгийн 2024 оны онцлох хүүхэд
- 2023, 2024 өсвөрийн боксын аймаг, олон хотын тэмцээний хүрэл медальт
- 2024 оны Боксын Улсын аварга шалгаруулах тэмцээний алтан медальт
- 2024, 2025 онд аймаг улсын хэмжээнд “МИНИЙ БАХАРХАЛ” монгол уран бичлэгийн бие даасан үзэсгэлэн гаргасан авьяаслаг охин юм.
Мөн “Путонха” сургуулийн сурагч М.Маралмаа гар урлал, нэхмэл бүтээлээ, Г.В. Плехановын нэрэмжит сургуулийн сурагч Б.Наранжин “Даашинзан алчуурт тохиолдсон явдал” нэртэй номоо танилцуулж, оролцогчдын талархлыг хүлээлээ.
Өдөрлөгийн төгсгөлд охид өөрсддөө тулгамдаж буй асуудлаар захидал бичиж сэтгэгдлээ үлдээв.
Хүүхдийн төв номын сангийн соёл боловсролын хөтөлбөрийг аргазүйч Ц.Гэрэлтуяа:
Өнөөдөр охидын тулгамдсан асуудлыг шийдэх, охидыг хүчирхэгжүүлэх, охидын эрхийг хамгаалахад олон нийтийн анхаарлыг хандуулах, бүтээлч охидын үйл ажиллагааг дэмжих, бүтээлийг нийгэмд таниулах зорилгоор энэ өдөрлөгийг зохион байгуулж байна.
Монголын Урлагийн Сэтгэл Заслын Мэргэжлийн холбооны тэргүүн В.Бэрцэцэг:
Хүүхэд хөгжил хамгааллын салбар жил болгон энэ асуудлаар үйл ажиллагаанууд зохион байгуулдаг. Харин энэ жил соёлын салбар хүүхэд хөгжил хамгааллын асуудалд анхаарлаа хандуулж, охидын эрхийн асуудлыг хөндөж арга хэмжээ зохион байгуулж байгаа нь онцлогтой байна. Өнөөдрийн арга хэмжээнд би илтгэл тавьж, арга хэмжээний дараа охидод тулгамдсан асуудлын талаар ганцаарчилан ярилцана.
30-р сургуулийн 12е ангийн сурагч О.Энхжин:
Монголд чөлөөт цагаа өнгөрөөх газар маш цөөхөн байдаг. Кофе шоп, номын сангаас өөр тухтай суух газар байдаггүй. Автобус их хол зайтай ирдэг болохоор хүмүүс маш их шахалдаантай. Сургуулийн хүүхдүүдийг том хүмүүс "залуу хүн байж бос" гэх нь хэцүү байдаг. Олон нийтийн бие засах газар их муухай. Хүмүүс соёлтой үйлчлүүлдэг болоосой.
30-р сургуулийн 8г ангийн сурагч Н.Ану:
Ногоон талбай, цэцэрлэгт хүрээлэн олон байгаасай. Би сагс тоглох дуртай болохоор шийд бас олон байгаасай. Автобус дэндүү их хүнтэй байдаг. Бас бороо цас орсон үед маш их түгжрэлтэй байдаг. Гудамж талбайд архи уусан хүмүүс араас дагах, хараал хэлэх нь аймшигтай байдаг. Охидоо хайрлаж, охидынхоо биед хамаагүй халдахгүй байгаарай.
