Арван жилийн найзууд, дасал болсон сургуулиа орхин оюутны амьдралд хөл тавьж буй шинэхэн ботгонууддаа зориулан эл нийтлэлээ хүргэж байна. Лекцийн тэмдэглэлээ хөтлөх, бие даалтаа хийх, ппт, семинараа бэлтгэх, багийн ажлаа гүйцэтгэх гээд завгүй өдрүүд удахгүй эхлэх нь дээ.
Ингээд Yolo.mn сайтын зүгээс нэгдүгээрт курст элсэн орж буй шинэхэн оюутнуудын заавал татаж авах 7 аппликэйшныг танилцуулж байна. Ямар их сургуульд орсноос шалтгаалан доорх аппликэйшнуудын зарим нь хэрэглэгдэхгүй байж болно. Гэхдээ ихэнх нь хэрэг болно шүү.
MICROSOFT POWERPOINT
Энэ бол оюутан залуусын хамгийн их ашигладаг аппликэйшнүүдийн нэг. Арван жилийн хичээлээс нэг ялгарах зүйл нь их сургуульд өөрийн ярьж буй зүйлээ persentation хэлбэрээр бусдадаа хүргэдэг. Арван жилд бол төдийлөн ппт тавиад байдаггүй шүү дээ. Харин их сургуульд бол бараг л хичээл болгон дээр л ппт тавина. Хэрэглэхэд амар, ойлгомжтой байдаг тул оюутнууд эл аппликэйшныг ихэвчлэн хэрэглэдэг.
GOOGLE SLIDES
Бас л persentation бэлдэх зориулалттай аппликэйшн. Гэхдээ илүү амархан. Багийн ажлаа гүйцэтгэхдээ эл аппликэйшныг хэрэглэхэд тохиромжтой. Нэг слайд дээр хэдэн ч хүн зэрэгцээд юм хийж, сэтгэгдэл үлдээж болно. Powerpoint-ын слайдууд зарим нь төлбөртэй байдаг. Харин Google slides-ийнх бүгд үнэгүй гэдгээрээ давуу талтай. Мөн автоматаар хадгалагдах функцтэй тул нөатбүүк, гар утас чинь гэнэт унтарсан ч санаа зовох зүйлгүй.
CANVA
Persentation бэлдэх, CV, постер хийх, зураг янзлах, инфографик гээд төрөл бүрийн зүйлсийг хамгийн загварлаг бүтээдэг аппликэйшн бол “Canva”. Зарим загварууд нь төлбөртэй байдаг хэдий ч төлбөргүй маш олон гоёмсог загвар бий. Бусад аппликэйшнууд persentation-дээ бичлэг оруулах жаахан төвөгтэй байдаг. Харин “Canva” оруулах зураг, бичлэгээ copy paste хийгээд л болоо. Мөн автоматаар хадгалагддаг.
NOTION
Хичээлийн лекц, бие даалт, шалгалт, өдөр тутмын ажлуудаа эмх цэгцтэй хөтлөхөд энэхүү апп танд тусална. Гар утас, таблет, компьютер гээд бүх төрлийн төхөөрөмж дээр ашиглах боломжтой. Хичээл бүрийнхээ нэрээр folder үүсгээд лекцээ текст, зураг, pdf, аудио болон бичлэг оруулж тэмдэглэл хөтөлж болно. Багшийн өгсөн даалгавар, бие даалтын хугацааг тэмдэглэчихвэл тухайн өдөр дөхөхөд автоматаар мэдэгдэл илгээнэ. Мөн багийн ажил гүйцэтгэхэд нэг файлаа бусдадаа хуваалцаж, зэрэг хянах боломжтой аж.
GOOGLE MAPS
Шинэ оюутан болж буй хөөрхөн ботгонууд маань хичээлийн байруудаа олохгүй жаахан төөрч будилна. Мөн хичээлээс гадна хот доторх номын сан, кофе шоп, хоолны газар, сургалтын төв гээд олон газар очих шаардлага гардаг. Энэ үед чамайг “Google Maps” замчлах болно. Хаанаас яаж явах, ямар автобусанд суух, хэр удаан алхах зэрэг нь маш тодорхой харагддаг тул хэрэглэхэд хялбар байна.
MICROSOFT TEAMS
Зарим их дээд сургуулиуд “Microsoft teams” аппыг хичээлдээ ашигладаг. Тэр дундаа МУИС, МУБИС. Багш нар нь хичээлийн бие даалт, яаралтай дуулгах зар, хичээлийн үнэлгээ, лекц зэргээ тухайн аппликэйшнд байршуулдаг. Мөн багшийнхаа хувийн орон зайд халдаж Facebook, Instagram-аар мессеж үлдээлгүй teams хаягаар нь харьцахад амархан байх болно.
GRAMMARLY
Их сургуульд орох үед англи хэлний мэдлэг их хэрэг болно. Гэхдээ эл аппликэйшны тусламжтайгаар англи хэлний бичих чадвараа сайжруулах боломжтой. Тус апп нь үг, өгүүлбэрийн алдааг нарийн засаж, бичиж буй өгүүлбэрт чинь тулгуурлан дараагийн үгийн сонголтыг харуулж өгдөг тул хэн нэгэнтэй англиар харилцахад асуудалгүй байх болно.
