Ихэнх хүмүүс глютенд мэдрэг байдал гэхээр гэдэс базлах, дүүрэх зэрэг хоол боловсруулах эрхтний асуудлыг төсөөлдөг. Гэвч глютений мэдрэг байдал заримдаа огт гэдэсний шинж тэмдэггүйгээр, огт өөр, гайхмаар байдлаар илэрч болдог.
Хэрвээ танд шалтгаангүй шинж тэмдгүүд илэрч, тодорхой эмнэлгийн тайлбар олдохгүй байгаа бол өөрийн хэрэглэж буй хоол хүнсэндээ дахин анхаарал хандуулаарай. Доорх 11 шинж тэмдэг нь глютений мэдрэг байдлыг илтгэж байж мэднэ.
1. Арьсны тууралт, загатнаа
Халуунд, стресс эсвэл харшилд хамаарах мэт санагдах арьсны загатнаа, халуу дүүгэх, шатах мэдрэмж глютений хариу урвал байж болно. Мэдрэг хүмүүсийн хувьд глютен нь дархлааны тогтолцоог идэвхжүүлж, арьсанд эсрэг бие хуримтлагдан тууралт, усархаг гүвдрүү үүсгэж болдог.
2. Тархины манан, анхаарал сарнилт
Хэрвээ та байнга мартах, анхаарал төвлөрөхөд бэрхшээлтэй байвал энэ нь зүгээр ядаргаа эсвэл стрессээс болдоггүй байж магадгүй. Ийм "тархины манан" гэдэг нь глютенд хэт мэдрэг хүмүүсийн дунд түгээмэл тохиолддог ч амархан анзаарагддаггүй шинж тэмдэг юм.
3. Сэтгэл санааны савлагаа, түгшүүр
Шалтгаангүйгээр ууртай болох, сэтгэл түгших нь глютентэй холбоотой байж болдог. Зарим судалгаагаар глютений хэрэглээг зогсоосноор түгшүүрийн түвшин буурдаг болохыг харуулсан байдаг.
4. Чих шуугих эсвэл дуу чимээнд мэдрэмтгий болох
Тасралтгүй чимээ сонсогдох, чимээнд дургүй болох зэрэг нь мэдрэлийн үрэвсэлтэй холбоотойгоор глютений нөлөөллөөс үүсч болдог. Хоолны дараа шинж тэмдэг сэдэрдэг бол анхаарах хэрэгтэй.
5. Аманд төмөр амтагдах
Юу ч идээгүй үед аманд төмөр амтагдах нь глютентэй холбоотой ховор боловч илэрдэг шинж. Энэ нь амтлах мэдрэмжийг өөрчилж, хоолны дуршилд сөргөөр нөлөөлнө.
6. Гар, хөл бадайрах эсвэл мэдээгүй болох
Гар, хөл, хуруу мэдээ алдах, бадайрах нь мэдрэлийн үрэвслээс үүдэлтэй байж болдог бөгөөд глютен үүнийг өдөөдөг. Энэ нь бусад өвчинтэй төстэй байж болох тул хоолны дараа холбоотой эсэхийг ажиглаарай.
7. Нойрны хямрал
Унтаж чадахгүй байх, шөнө дунд сэрэх зэрэг нь глютены хариу үйлдэл байж болдог. Стрессээс гадна хоол хүнсний мэдрэг байдал ч шалтгаан болж чадна.
8. Байнга хамар битүүрэх
Хамар битүүрэх, нус гоожих зэрэг нь улирлын харшил гэж бодогддог ч глютен дархлааг идэвхжүүлж, гистамин ялгаруулснаар хамрын салстыг цочроох боломжтой.
9. Үс унах
Гэнэт үс шингэрэх, унах нь шим тэжээлийн дутагдлаас үүдэлтэй байж болох ба глютений мэдрэг байдал нь нарийн гэдсэнд гэмтэл учруулснаар шим тэжээл шингэхэд саад болдог.
10. Шүдний мэдрэмтгий болох, өнгөө алдах
Шүд хэт мэдрэмтгий болох, шарлах, цоорох зэрэг нь кальци дутагдсантай холбоотой бөгөөд глютений мэдрэг байдал шим тэжээл шингээх чадварт нөлөөлдөг тул ийм асуудал үүсч болдог.
11. Жирэмслэхэд хүндрэл гарах
Глютен үрэвсэл үүсгэж, шим тэжээлийн дутагдалд хүргэснээр дааврын тэнцвэрт байдал алдагдаж, нөхөн үржихүйн эрхтэнд нөлөөлөх боломжтой. Сарын тэмдгийн мөчлөг алдагдах нь ч түгээмэл тохиолдол юм.
Хэрвээ дээрх шинжүүд танд илэрдэг бөгөөд шалтгаан нь тодорхой бус байвал глютен хэрэглээгээ хянаж үзэх талаар эмчтэйгээ зөвлөлдөөрэй.
