#PUBGMobile 2025 оны улирлын нээлт болсон $409,000 (1.4 тэрбум төгрөг) шагналын сантай том тэмцээний MVP-ээр монгол тоглогч тодров.
KRAFTON-оос зохиож буй PUBG Mobile-ын 2025 оны улирлын нээлт, $409,000 (1.4 тэрбум төгрөг) шагналын сантай "PUBG Mobile Global Open 2025" тэмцээн Узбекистаны нийслэл Ташкент хотод боллоо.
Дэлхийн шилдэг 16 баг хоёр өдрийн турш өрсөлдсөн тэмцээнд Монголын "4Merical Vibes" баг урилгаар оролцсон бөгөөд багийн тоглогч Ууганбаярын "DOK" Дөлгөөн тэмцээний MVP /Most Valuable Player/ буюу шилдгээр нэрлэгдэв.
Тэрээр нийт 18 тоглолтод 19 elims /Эсрэг багийн тоглогчийг тоглолтоос хассан тоо/, 9 assists /Эсрэг багийн тоглогчийг тоглолтоос хасахад тусалсан/, 17 knocks /Эсрэг багийн тоглогчийг тоглох боломжгүй болгож, тоглолтоос хасахад хүргэх/, 4434 damage /Эсрэг багийн тоглогчдод үзүүлсэн хохирол/ үзүүлжээ.
Хэдий У.Дөлгөөн ийнхүү сайн тоглосон ч 4Merical Vibes баг 58 онотойгоор 13-р байрыг эзэлсэн юм. Тэд шагнал болгож $13,000 /45.9 сая төгрөг/ авсан.
Харин тэмцээнд Туркийн алдарт "Regnum Carya Esports" баг 106 оноотойгоор арын багаас 20 оноо илүү тасарч түрүүлэн $100,000 авав. Тэдний араас Европын "Nigma Galaxy", Узбекистаны "THE721 AGGRESSOR" багууд удаалсан.
PUBG Mobile-ын 2025 оны улирлын тэмцээнүүд ийнхүү эхэлж байна. Удахгүй "PUBG Mobile Super League - Central & South Asia Spring 2025" тэмцээн эхлэх бөгөөд Монголын 4Merical Vibes багаас гадна "Champions Esports" баг оролцоно. Уг тэмцээнд эхний гурван байрыг эзэлсэн багууд энэ оны дэлхийн цомын тэмцээнд оролцох эрхийн авна.
