Өмнөд Солонгосын залуу жүжигчин Kim Sae Ron энэ оны хоёрдугаар сарын 16-нд Сөүл дэх гэртээ нас барсан байдалтай олдсон нь олон нийтийг цочирдуулаад байсан билээ. Цагдаагийн газраас түүний үхлийг амиа хорлолт гэж үзэж байгаа бөгөөд ослын болон гадны нөлөөтэй холбоотой шинж тэмдэг илрээгүй учир ийнхүү мэдэгдсэн байна.
Kim Sae Ron 2022 онд согтуугаар тээврийн хэрэгсэл жолоодон явж байгаад цахилгааны шон мөргөж, осол гаргасан. Түүний цусан дах согтууруулах ундааны агууламж хуульд заасан хязгаараас хэтэрсэн болох нь батлагдсан байна. Энэхүү хэрэг нь түүнийг карьерт хүнд цохилт болж, маш их хэмжээний өрөнд орон, солонгосчуудын үзэн ядалтыг аваад байсан. Тэрээр өрөө дарахын тулд цагийн ажил хийн хичээж байсан хэдий ч харамсалтай нь энэ онд нас барсан юм. Түүнийг үзэн ядалт, маш их өрнөөс болж амиа егүүтгэлээ хэмээн бодож байсан ч саяхан түүний авга эгч Kim Sae Ron-ы үхэлд жүжигчин Kim Soo Hyun буруутай хэмээн мэдээлжээ.
Kim Sae Ron авга эгч “Kim Sae Ron 15 настай байхаасаа 21 нас хүртлээ Kim Soo Hyun-тай үерхсэн. 2022 оны машины осол болоход тэд аль хэдийн салсан байсан ч Kim Soo Hyun болон агентлаг нь өөрсдөө гэнэт гарч ирэн хариуцлага хүлээж, нийт 700 сая воны хохирлыг барагдуулсан. Хохирлыг барагдуулаад буцаагаад төлөөрэй гэж юу ч хэлээгүй. Kim Sae Ron энэхүү явдалд талархаж, мөнгө олохоороо төлнө гэдгээ хэлж байсан. Гэтэл гэнэт 2024 онд 700 сая воноо төл гэсэн мэдэгдэл ирсэн. Kim Sae Ron гайхаад Kim Soo Hyun-тай холбогдох гэсэн ч чадаагүй.
Тиймээс Kim Soo Hyun-тай холбогдох эцсийн арга нь хамтдаа авхуулсан зургаа инстаграмдаа хальт хийх байсан. Гэвч Kim Soo Hyun огт танихгүй хүн шиг хандаад, няцаасан мэдэгдэл хийсэн байсан. Үүний дараа ч холбогдоогүй. Эцэст нь Kim Sae Ron 700 сая воны өрөө төлж дийлэлгүй, санхүүгийн асуудлаас болоод Kim Soo Hyun-ы төрсөн өдрөөр амиа хорлосон. Тэдний хамтдаа авхуулсан зураг зөндөө тул дэлгэх боломжтой” гэжээ.
Энэхүү асуудалд Kim Soo Hyun-ы агентлагаас үндэслэлгүй, худал зүйл хэмээн үгүйсгэсэн мэдэгдэл хийсэн байна. Мөн худал мэдээлэл тарааж буйд хатуу хариуцлага ноогдуулна хэмээн мэдээлжээ.
Үүний дараагаар Kim Soo Hyun болон талийгаач бүсгүйн хамт авхуулсан өөр нэг зураг болон Kim Sae Ron-ы бичсэн зурвас олон нийтэд ил болжээ.
Зурваст, “Ахаа, Би Saeron байна. Надад хуулийн нэхэмжлэл ирсэн. Та үнэхээр намайг шүүхэд өгч байгаа юм уу? Та надад хангалттай хугацаа өгнө гэж хэлсэн болохоор би эргэн ирэлтээ хийх гэж шаргуу ажиллаж байна. Би бага багаар буцааж төлөхөөр төлөвлөж байсан. Би төлөхгүй гээгүй, нэг дор 700 сая вон өгч чадахгүй байна. Үнэхээр шүүхэд хандах ёстой гэж үү? Надад жаахан хугацаа өгөөч. Би танаас гуйж байна” хэмээн 2024 оны гуравдугаар сарын 19-нд бичиж байжээ.
Одоогоор Kim Soo Hyun “Knock Off” цувралд тоглох гэж байгаа бөгөөд зураг авалт нь явагдаж байгаа юм. Тус цувралыг хийж буй Disney+ компаниас болж буй үйл явдлаас үл хамааран зураг авалтыг зогсоохгүй, үргэлжлүүлэн хийнэ гэдгээ ч мэдэгдсэн байна.
Kim Soo Hyun өнөөдрийн байдлаар Prada, HEBE Beauty, KOSÉ, Jo Malone London зэрэг 19 брэндийн нүүр царайгаар ажилладаг. Kim Sae Ron-ы нас барсантай холбоотойгоор солонгосын нетизенчүүд түүнийг эдгээр брэндээс огцруулахыг хүсэж байгаа юм. Эс бөгөөс “Boycott” зарлана гэлээ. Boycott гэдэг нь тодорхой нэг хүн, байгууллага, компани, улс орны эсрэг эсэргүүцэл үзүүлэх зорилгоор тэдний бүтээгдэхүүн, үйлчилгээг хэрэглэхээс татгалзах үзэгдэл юм.
Одоо болж буй нөхцөл байдлаас үүдэн Kim Soo Hyun-ы цахим хаягууд сөрөг сэтгэгдэл, шүүмжлэлд дарагдсаар байна.
Эх сурвалж: Оддын баримт, The Korean Times, Koreaboo
